തമിഴ് സൂപ്പര്‍താരം വിജയ് സേതുപതി ആദ്യമായി അഭിനയിക്കുന്ന മലയാളം സിനിമ മാര്‍ക്കോണി മത്തായിയുടെ ട്രെയ്‌ലര്‍ പുറത്ത്. ജയറാമാണ് ചിത്രത്തില്‍ നായകനായി എത്തുന്നത്. തമിഴ് സിനിമ താരത്തിന്റെ റോളിലാണ് വിജയ് സേതുപതി ചിത്രത്തില്‍ എത്തുന്നത്. കുടുംബ പ്രേക്ഷകരെ തീയെറ്ററില്‍ എത്തിക്കാനുള്ള നമ്പറുകളുമായാണ് ചിത്രം എത്തുന്നത്. ജയറാമിന്റെ കോമഡിയാണ് ട്രെയ്‌ലറിന്റെ പ്രധാന ആകര്‍ഷണം. 

മലയാളത്തില്‍ ഒരുപാട് ആരാധകരുള്ള നടനാണ് വിജയ് സേതുപതി. താരത്തിന്റെ മലയാളത്തിലേക്കുള്ള അരങ്ങേറ്റം വളരെ പ്രതീക്ഷയോടെയാണ് ആരാധകര്‍ കാത്തിരിക്കുന്നത്. മാര്‍ക്കോണി മത്തായി എന്ന സെക്യൂരിറ്റിക്കാരനായാണ് ജയറാം എത്തുന്നത്. ഛായാഗ്രാഹകന്‍ സനില്‍ കളത്തില്‍ ആദ്യമായി സംവിധാനം ചെയ്യുന്ന ചിത്രമാണ് ഇത്. ജോസഫിലൂടെ ആരാധകരുടെ മനം കവര്‍ന്ന ആത്മിയയാണ് നായികയായി എത്തുന്നത്. ഹസ്യത്തിന് പ്രധാന്യം നല്‍കിയ ചിത്രത്തിന്റെ തിരക്കഥ തയാറാക്കുന്നത് രാജേഷ് മിഥിലയും സനില്‍ കളത്തിലും ചേര്‍ന്നാണ്.