അച്ഛൻ ബോബൻ കുഞ്ചാക്കോയുടെ ഓർമ്മദിനത്തിൽ വികാരഭരിതനായി നടൻ കുഞ്ചാക്കോ ബോബൻ. അച്ഛനെക്കുറിച്ചുള്ള മനോഹരമായ കുറിപ്പാണ് താരം സോഷ്യൽ മീഡിയയിൽ പങ്കുവെച്ചത്. അച്ഛൻ പകർന്നു തന്ന അറിവ് തന്നെ എത്രത്തോളം സ്വാധീനിച്ചിട്ടുണ്ടെന്നാണ് താരം കുറിക്കുന്നത്. അച്ഛനൊപ്പമുള്ള തന്റെ കുട്ടിക്കാലത്തെ ഫോട്ടോയും കുഞ്ചാക്കോ ബോബൻ പങ്കുവെച്ചിട്ടുണ്ട്. 2004 ജൂലൈ 9 നാണ് ബോബൻ കുഞ്ചാക്കോ വിടപറയുന്നത്. ചലച്ചിത്രനടൻ, സംവിധായകൻ, നിർമാതാവ് എന്നീ മേഖലകളിൽ ശ്രദ്ധേയനായിരുന്നു അദ്ദേഹം.

കുഞ്ചാക്കോ ബോബന്റെ കുറിപ്പ്

ഒരു പക്ഷെ, എല്ലാം തികഞ്ഞ മനുഷ്യനായിരിക്കില്ല... സമ്പൂർണനായിരിക്കില്ല...(പക്ഷെ, അങ്ങനെയാരാണുള്ളത്?) എനിക്ക് ഏറ്റവും മൃദുവായ ഹൃദയമുള്ളവനും കനിവുള്ളവനുമാണ്! മഹത്തായ പ്രചോദകനും സംരക്ഷകനും!! ചലിക്കുന്ന സർവ്വ വിജ്ഞാനകോശം!!! വല്ലപ്പോഴും എനിക്കങ്ങയെ മിസ് ചെയ്യും (അതെ, എന്റെ ജീവിതത്തിലെ ആഹ്ലാദപൂർണമായ സന്ദർഭങ്ങളിൽ). കാരണം, നമ്മുടെ കുടുംബത്തിനു ചുറ്റും, അങ്ങയുടെ (എന്റെയും) ചങ്ങാതിമാരിലൂടെ, അങ്ങ് സഹായിച്ചിട്ടുള്ളവരിലൂടെ അങ്ങയുടെ സാന്നിധ്യം ഞാൻ സദാ അനുഭവിച്ചുകൊണ്ടേയിരിക്കുന്നു. എന്റെ ജീവിതത്തിലെ ഏറ്റവും മഹത്തരമായ പാഠം പഠിപ്പിച്ചു തന്നതിനു നന്ദി. ഈ ലോകത്തുള്ളവരെ മുഴുവൻ സ്വന്തം കുടുംബം പോലെ കരുതാൻ കഴിയുന്നതിൽ. ലൗ യു അപ്പാ, ഇസ്സുവിന്റെ ബോബൻ അപ്പാപ്പ.