ഇത്രയും വ്യത്യസ്തമായ വിവാഹാഭ്യാര്‍ത്ഥന മറ്റാര്‍ക്കും കിട്ടിയിട്ടുണ്ടാവില്ല. ബോളിവുഡ് നടി തപ്‌സി പാനുവിന് കിട്ടിയ ഒരു വിവാഹാഭ്യര്‍ത്ഥനയാണ് ഇപ്പോള്‍ സോഷ്യല്‍ മീഡിയയില്‍ പ്രധാന ചര്‍ച്ചാവിഷയം. ബോളിവുഡില്‍ തിരക്കുള്ള നായികയായതോടെ തപ്‌സിയുടെ ആരാധകരുടെ എണ്ണവും കൂടി. എന്നാല്‍ കഴിഞ്ഞ ദിവസം തനിക്ക് വന്ന ഒരു കത്ത് വായിച്ച് കണ്ണുതള്ളി ഇരിക്കുകയാണ് തപ്‌സി. 

താന്‍ വെര്‍ജിനാണെന്നും നുണപരിശോധന ഉള്‍പ്പടെയുള്ള എന്ത് ടെസ്റ്റും നടത്താനും ഒരുക്കമാണെന്നുമാണ് വിവാഹാഭ്യര്‍ത്ഥനയില്‍ പറയുന്നത്. തന്റെ ഗുണഗണങ്ങളെല്ലാം ആരാധകന്‍ കത്തില്‍ ഉള്‍പ്പെടുത്തിയിട്ടുണ്ട്. ഞാന്‍ നിങ്ങളെ സ്‌നേഹിക്കുന്നു. എന്നെ വിവാഹം കഴിച്ച് എന്റെ ജീവിതകാലം മുഴുവന്‍ കൂടെയുണ്ടാകുമോ? ഞാന്‍ വെര്‍ജിനാണ്, മദ്യപിക്കാറില്ല, സസ്യാഹാരിയാണ്. നുണ പരിശോധനയ്ക്കും നാര്‍കോ ടെസ്റ്റിനും ബ്രെയിന്‍ മാപ്പിങ്ങിനും വരെ തയാറാണ്. എന്നാണ് ആരാധകന്‍ കുറിച്ചു. 

തപ്‌സി പാനു തന്നെയാണ് ട്വിറ്ററിലൂടെ വിവാഹാഭ്യര്‍ത്ഥന പുറത്തുവിട്ടത്. ഇനി ജീവിതത്തില്‍ വേറെന്തുവേണം എന്ന ക്യാപ്ഷനോടെയാണ് മെയിലിന്റെ സ്‌ക്രീന്‍ഷോട്ട് ഷെയര്‍ ചെയ്തത്. ബെസ്റ്റ് പ്രപ്പോസല്‍ എവര്‍ എന്ന ഹാഷ്ടാഗും ഉള്‍പ്പെടുത്തിയിട്ടുണ്ട്. എന്നാല്‍ ഇത് വെറും ഫോട്ടോഷോപ്പാണെന്ന് പറഞ്ഞ് തപ്‌സിക്കെതിരേ വിമര്‍ശനവും ഉയരുന്നുണ്ട്.