തമിഴ് സിനിമ ലോകത്ത് ദിലീപ് അറിയപ്പെടുന്നത് 'രാക്ഷസനടികന്‍' എന്നാണെന്ന് തെന്നിന്ത്യന്‍ താരം സിദ്ധാര്‍ഥ്. ഒപ്പം അഭിനയിക്കുന്നവരെ തന്റെ അഭിനയ മികവുകൊണ്ട് മറികടക്കുന്ന നടനാണ് ദിലീപ്. അതിനാല്‍ അദ്ദേഹത്തിന് തമിഴ് സിനിമ ലോകം നല്‍കിയിരിക്കുന്ന പേര് 'രാക്ഷസനടികന്‍' എന്നാണെന്ന് കമ്മാര സംഭവം എന്ന ചിത്രത്തിന്റെ ഓഡിയോ ലോഞ്ചിങ്ങില്‍ പങ്കെടുത്തുകൊണ്ട് സിദ്ധാര്‍ഥ് പറഞ്ഞു. 

കമ്മാര സംഭവത്തില്‍ പ്രധാന കഥാപാത്രത്തെയാണ് സിദ്ധാര്‍ഥ് അവതരിപ്പിക്കുന്നത്. താരത്തിന്റെ ആദ്യ മലയാളം ചിത്രം കൂടിയാണിത്. പതിനേഴ് വര്‍ഷത്തെ കാത്തിരിപ്പിന് ശേഷമാണ് മലയാളത്തില്‍ അവസരം ലഭിച്ചതെന്നും അത് ദിലീപിനെ പോലെ ഒരു വലിയ താരത്തിനൊപ്പം ആയതില്‍ സന്തോഷമുണ്ടെന്നും സിദ്ധാര്‍ഥ് പറഞ്ഞു. ദിലീപിന്റെ കരിയറിലെ തന്നെ മികച്ച ചിത്രമായിരിക്കും കമ്മാരസംഭവമെന്നും താരം കൂട്ടിച്ചേര്‍ത്തു. ദിലീപിനെക്കുറിച്ചുള്ള താരത്തിന്റെ വാക്കുകള്‍ നിറഞ്ഞ കൈയോടെയാണ് സദസ് സ്വീകരിച്ചത്. 

കമ്മാര സംഭവം സിനിമ ചലച്ചിത്രത്തില്‍ തന്നെ നാഴികക്കല്ലാകുമെന്നാണ് സിദ്ധാര്‍ഥ് പറയുന്നത്. ഇനിയും മലയാള സിനിമയില്‍ അഭിനയിക്കാന്‍ താല്‍പ്പര്യമുണ്ടെന്നും താരം കൂട്ടിച്ചേര്‍ത്തു.