കൊച്ചി: കോവിഡ് വ്യാപനത്തിന്റെ പശ്ചാത്തലത്തില് പ്രതിസന്ധി മറികടക്കാന് സിനിമാ താരങ്ങള് സഹകരിക്കണമെന്ന് നിര്മ്മാതാക്കള്. താരങ്ങള് പ്രതിഫലം കുറയ്ക്കണം. എങ്കില് മാത്രമേ നിര്മ്മാണ ചെലവ് പകുതിയായി കുറയ്ക്കാന് സാധിക്കുകയുളളൂ. ഇല്ലെങ്കില് പുതിയ സിനിമകള് ഉണ്ടാകില്ലെന്നും പ്രൊഡ്യൂസേഴ്സ് അസോസിയേഷന് വാര്ത്താസമ്മേളനത്തില് പറഞ്ഞു.
കോവിഡ് വ്യാപനം തടയാന് പ്രഖ്യാപിച്ച ലോക്ക്ഡൗണിനെ തുടര്ന്ന് കഴിഞ്ഞ രണ്ടുമാസമായി സിനിമാ ചിത്രീകരണം നിര്ത്തിവെച്ചിരിക്കുകയായിരുന്നു. രാജ്യം ഘട്ടം ഘട്ടമായി തുറക്കുന്നതിന്റെ ഭാഗമായി കേന്ദ്രസര്ക്കാര് പുറപ്പെടുവിച്ച മാര്ഗരേഖയുടെ ചുവടുപിടിച്ച് കേരള സര്ക്കാര് നിയന്ത്രണങ്ങളോടെ ഷൂട്ടിങ് ആരംഭിക്കാന് അനുമതി നല്കിയിരുന്നു. ഇതിനെ തുടര്ന്നാണ് പ്രതിസന്ധി മറികടക്കാന് നിര്മ്മാതാക്കള് സിനിമാ താരങ്ങള്ക്ക് മുന്പില് നിര്ദേശങ്ങള് മുന്നോട്ടുവെച്ചത്.
താരങ്ങള് പ്രതിഫലം കുറയ്ക്കണമെന്നതാണ് മുഖ്യ ആവശ്യം. ഇല്ലെങ്കില് പുതിയ സിനിമകള് ഉണ്ടാകില്ലെന്നാണ് നിര്മ്മാതാക്കള് നല്കുന്ന മുന്നറിയിപ്പ്. ഇക്കാര്യങ്ങള് താരങ്ങളുടെ സംഘടനയായ അമ്മയുമായും സാങ്കേതികപ്രവര്ത്തകരുടെ സംഘടനയായ ഫെഫ്കയുമായും ചര്ച്ച നടത്തുമെന്നും പ്രൊഡ്യൂസേഴ്സ് അസോസിയേഷന് അറിയിച്ചു.
സുരക്ഷാ മാനദണ്ഡങ്ങള് പാലിച്ച് നിയന്ത്രണങ്ങളോടെ സിനിമാ ഷൂട്ടിങ് പുനരാരംഭിക്കാന് അനുവദിക്കുമെന്നാണ് മുഖ്യമന്ത്രി പിണറായി വിജയന് വാര്ത്താസമ്മേളനത്തില് പറഞ്ഞത്. 50പേരെ വച്ച് സിനിമാ ഷൂട്ടിങ് നടത്താനാണ് അനുമതി നല്കിയത്. സ്റ്റുഡിയോയ്ക്ക് അകത്തും ഈ പരിധി പാലിക്കണം. ചാനലിലെ ഇന്ഡോര് ഷൂട്ടിങ്ങിനും നിയന്ത്രണമുണ്ട്. പരമാവധി 25 പേര് മാത്രമേ ഇത്തരം പരിപാടികളില് പങ്കെടുക്കാന് പാടുളളൂവെന്നും മുഖ്യമന്ത്രി പിണറായി വിജയന് പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates