ഡിജിറ്റല്‍ വീഡിയോ രംഗത്തേക്കുളള ബോളിവുഡ് നടന്‍ അക്ഷയ്കുമാറിന്റെ സാഹസിക എന്‍ട്രിയാണ് കഴിഞ്ഞദിവസം സാമൂഹ്യമാധ്യമങ്ങളില്‍ ചര്‍ച്ചയായത്. ആമസോണിന്റെ ദ എന്‍ഡ് എന്ന പരമ്പരയിലൂടെയാണ് അക്ഷയ്കുമാര്‍ ഡിജിറ്റല്‍ രംഗത്തേക്ക് കടന്നുവന്നിരിക്കുന്നത്. ഇതിന്റെ ഭാഗമായി അക്ഷയ് നടത്തിയ റാംപ് വാക്ക് ഞെട്ടലോടെയാണ് എല്ലാവരും കണ്ടത്. 

തീ പടര്‍ന്ന വസ്ത്രം ധരിച്ചാണ് അക്ഷയ് റാംപിലെത്തിയത്. ഇതിന്റെ വീഡിയോയും ചിത്രങ്ങളും കഴിഞ്ഞദിവസം വ്യാപകമായ രീതിയില്‍ പ്രചരിച്ചിരുന്നു.വീഡിയോ അക്ഷയ്കുമാര്‍ ട്വിറ്ററിലും പങ്കുവെച്ചു. 

ആരാധകര്‍ ഏറ്റെടുത്തെങ്കിലും അക്ഷയയുടെ ഭാര്യ ട്വിങ്കിള്‍ ഖന്നയ്ക്ക് ഇത് അത്ര ഇഷ്ടപ്പെട്ടില്ല. തീ ആയി മാറുമെന്ന് പറഞ്ഞത് ഇതാണോ എന്ന് ട്വിങ്കിള്‍ ഖന്ന ട്വിറ്ററില്‍ ചോദിച്ചു. വീട്ടിലേക്ക് വരൂ, കൊല്ലാനുളള ദേഷ്യമുണ്ടെന്നും ട്വിങ്കിള്‍ കുറിച്ചു.