ശോഭനയും സുരേഷ് ഗോപിയും മുഖ്യ വേഷത്തിലെത്തുന്ന ദുൽഖർ സൽമാൻ നായകനാകുന്ന ചിത്രത്തിലേക്ക് കല്യാണി പ്രിയദർശനും. സത്യൻ അന്തിക്കാടിന്റെ മകൻ അനൂപ് അന്തിക്കാട് സംവിധാനം ചെയ്യുന്ന ചിത്രത്തിലാണ് കല്യാണി നായികയാകുന്നത്. 

ശോഭനയും കല്യാണിയും അമ്മയും മകളുമായാണ് അഭിനയിക്കുന്നതെന്നും അവരുടെ ജീവിതത്തിലേക്ക് കടന്നു വരുന്ന രണ്ടു പുരുഷന്മാരുടെ കഥാപാത്രങ്ങളാണ് ദുൽഖറും സുരേഷ് ഗോപിയും അവതരിപ്പിക്കുന്നതെന്നും അനൂപ് പറഞ്ഞു. നർമ്മബോധമുള്ള കഥാപാത്രമാണ് ശോഭനയുടേതെന്നും സംവിധായകൻ പറഞ്ഞു. 

മുമ്പ് നസ്രിയയായിരിക്കും ചിത്രത്തിൽ നായികയാകുന്നത് എന്ന റിപ്പോർട്ടുകൾ പുറത്തുവന്നിരുന്നെങ്കിലും കല്യാണിയാണ് നായിക എന്ന വിവരം അനൂപ് സ്ഥീരീകരിച്ചതായി ടൈംസ് ഓഫ് ഇന്ത്യ റിപ്പോർട്ട് ചെയ്തു. 

ഒക്ടോബറിൽ ചിത്രീകരണം ആരംഭിക്കുന്ന സിനിമയുടെ പേര് ഇനിയും പുറത്തുവിട്ടിട്ടില്ല. ചെന്നൈയിലാണ് ഷൂട്ടിങ്. എം സ്റ്റാർ കമ്മ്യൂണിക്കേഷൻസാണ് സിനിമ നിർമ്മിക്കുന്നത്.