കൊച്ചി: നടന്‍ സിദ്ദിഖിനെതിരെ ലൈംഗികാതിക്രമ ആരോപണവുമായി നടി രേവതി സമ്പത്ത്. തന്റെ ഫെയ്‌സ്ബുക്ക് പേജിലൂടെയാണ് ആരോപണവുമായി നടി രംഗത്തെത്തിയത്.

2016ല്‍ തിരുവനന്തപുരം നിള തിയേറ്ററില്‍ വച്ചാണ് സിദ്ദിഖ് അപമര്യാദയായി പെരുമാറിയത്. സുഖമായിരിക്കട്ടെ എന്ന പ്രിവ്യൂഷോയ്ക്കിടെയാണ് തന്നെ ലൈംഗികമായി അധിക്ഷേപിക്കാന്‍ സിദ്ദിഖ് ശ്രമിച്ചതെന്നാണ് നടി ആരോപിക്കുന്നത്. ആ സമയത്ത് തനിക്ക് 21 വയസ്സായിരുന്നെന്നും സിദ്ദിഖിന്റെ പെരുമാറ്റം തന്നെ വല്ലാതെ വേദനിപ്പിച്ചെന്നും നടി സമൂഹമാധ്യമത്തില്‍ പങ്കുവെച്ച പോസ്്റ്റില്‍ വ്യക്തമാക്കുന്നു.

അമ്മയുടെ പ്രതികരണം അറിയിക്കാന്‍ സിദ്ദിഖും കെപിഎസി ലളിതയും വിളിച്ചുചേര്‍ത്ത വാര്‍ത്താ സമ്മേളനത്തിന്റെ വീഡിയോയും ഫെയ്‌സ്ബുക്ക് പോസ്റ്റിനോടൊപ്പം നടി പങ്കുവെച്ചിട്ടുണ്ട്. വനിതാ കൂട്ടായ്മയായ ഡബ്ല്യൂസിസിക്കെതിരെ പരാമര്‍ശം നടത്താന്‍ നിങ്ങള്‍ക്ക് എന്ത് യോഗ്യതയാണ് ഉള്ളത്. നിങ്ങള്‍ മുഖം മൂടിയണിഞ്ഞ ജന്റില്‍മാനാണെന്നും രേവതി പറയുന്നു.