സംഗീത റിയാലിറ്റി ഷോയില്‍ പങ്കെടുക്കുന്ന പ്രായപൂര്‍ത്തിയാകാത്ത പെണ്‍കുട്ടിയെ ബലാല്‍ക്കാരമായി ചുംബിച്ചതിന് ഗായകനും സംഗീത സംവിധായകനുമായ പാപ്പോണിനെതിരേ പരാതി. ഷോയുടെ ഭാഗമായി നടത്തിയ ഹോളി ആഘോഷത്തിനിടെയാണ് പാപ്പോണ്‍ കുട്ടിയെ ചുംബിച്ചത്്. കുട്ടിയുടെ മുഖത്ത് നിറം തേച്ചതിന് ശേഷം കുട്ടിയുടെ ചുണ്ടില്‍ ചുംബിക്കുകയായിരുന്നു. ആഘോഷം ആരാധകരില്‍ എത്തിക്കാന്‍ ഫേയ്‌സ്ബുക് ലൈവ് ഇട്ടതിന് ശേഷമായിരുന്നു ചുംബനം. ഇതോടെ വീഡിയോ സോഷ്യല്‍ മീഡിയയില്‍ വൈറലായിരിക്കുകയാണ്. 

വോയ്‌സ് ഇന്ത്യ കിഡ് എന്ന റിയാലിറ്റി ഷോയിലെ ജഡ്ജുകളില്‍ ഒരാളാണ് പാപോണ്‍. സംഭവത്തില്‍ ദേശീയ ബാലാവകാശ കമ്മീഷനും പോക്‌സോ നിയപ്രകാരം പൊലീസും പാപ്പോണിനെതിരേ കേസെടുത്തു. പ്രായപൂര്‍ത്തിയാകാത്ത പെണ്‍കുട്ടിയ കൈയേറ്റം ചെയ്തു എന്നാരോപിച്ച് സുപ്രീംകോടതി അഭിഭാഷകനായ റുണ ഭുയാനാണ് ദേശീയ ബാലാവകാശ കമ്മീഷന് പരാതി നല്‍കിയത്. ഗായകനെതിരേ അന്വേഷണം നടത്തണമെന്നും റിയാലിറ്റി ഷോയിലെ ഇത്തരം അക്രമണങ്ങളില്‍ നിന്ന് കുട്ടികളെ രക്ഷിക്കാന്‍ നിയമങ്ങള്‍ കൊണ്ടുവരണമെന്നും അദ്ദേഹം ആവശ്യപ്പെട്ടു. 

ബര്‍ഫി, ബേഫികര്‍, സുല്‍ത്താന്‍, തുടങ്ങിയ സിനിമകളിലെ ഗാനങ്ങളിലൂടെ പ്രശസ്തനാണ് അസാമി ഗായകനായ പാപ്പോണ്‍. പരാതിയെക്കുറിച്ച് ഇതുവരെ പ്രതികരിച്ചിട്ടില്ല.