പാചകപരീക്ഷണങ്ങൾ നടത്തുന്ന പ്രീതി സിന്റയും മുറി വൃത്തിയാക്കുന്ന കത്രീന കൈഫുമെല്ലാം സോഷ്യൽ മീഡിയയിലെ പുത്തൻ വിശേഷങ്ങളാണ്. ഇക്കൂട്ടത്തിലേക്ക് ഇതാ ഒരു താരസുന്ദരി കൂടി എത്തിയിരിക്കുകയാണ്. നടി ശിൽപ ഷെട്ടിയാണ് ആ താരം. ചൂൽ ഉപയോ​ഗിച്ച് മുറ്റത്തെ ചവറ് അടിച്ചുകളയുന്ന താരത്തിന്റെ വിഡിയോയാണ് ട്വിറ്ററിൽ വൈറലാകുന്നത്. 

ശിൽപ തന്നെയാണ് ക്വാറന്റൈൻ ദിനത്തിലെ ഈ വിഡിയോ പങ്കുവച്ചിരിക്കുന്നത്. ലോക്ക്ഡൗൺ കാലം തനിക്ക് പകർന്ന പുതിയ തിരിച്ചറിവിനെക്കുറിച്ച് പങ്കുവച്ചുകൊണ്ടാണ് താരത്തിന്റെ ട്വീറ്റ്. വീട്ടുജോലിക്ക് സഹായിക്കാൻ എത്തുന്നവരുടെ പ്രാധാന്യത്തെക്കുറിച്ചാണ് താരം ട്വീറ്റിൽ പറഞ്ഞിരിക്കുന്നത്. നമ്മുടെയെല്ലാം ജീവിതം ഇത്ര എളുപ്പമാക്കുന്നത് അവരാണെന്ന് താരം കുറിച്ചു. 

"ദൗർഭാ​ഗ്യവശാൽ ഇത്തരം സന്ദർഭങ്ങളിൽ മാത്രമേ ഇക്കാര്യങ്ങൾ നമ്മൾ മനസ്സിലാക്കൂ. ഞങ്ങളുടെ ജീവിതം എളുപ്പമാക്കാൻ സഹായിച്ച എല്ലാവർക്കും ഞാനിന്ന് നന്ദിപറയുന്നു. പുറത്തിറങ്ങാനും നമ്മുടെ സ്വപ്നങ്ങൾ എത്തിപ്പിടിക്കാനുമൊക്കെ സാധിക്കുന്നത് അവർ ഉള്ളതുകൊണ്ടാണ്. ജീവിതം പഴയപടി ആകുമ്പോൾ അവരുടെ മൂല്യം മറക്കരുത്", താരം കുറിച്ചു.