തെലുങ്ക് ചിത്രത്തിനുവേണ്ടി കിടിലൻ മേക്കോവർ നടത്തിയിരിക്കുകയാണ് നടൻ ജയറാം. അല്ലു അര്ജുന് നായകനാവുന്ന ചിത്രത്തിൽ നായകന്റെ അച്ഛനായാണ് ജയറാം വേഷമിടുന്നത്. ശരീരഭാരം കുറച്ചതിന് ശേഷമുള്ള ജയറാമിന്റെ ചിത്രം കണ്ട് സോഷ്യൽ ലോകം ഒന്നടങ്കം കൈയ്യടിച്ചു. ഇപ്പോഴിതാ പുത്തൻ ലുക്കിൽ മറ്റൊരു ചിത്രം കൂടി പങ്കുവച്ചിരിക്കുകയാണ് താരം.
ഫെയ്സ്ബുക്കില് ഇടുന്നതിന് മുന്പ് ഫോട്ടോ മമ്മൂട്ടിക്ക് അയച്ചുകൊടുത്തിരുന്നെന്ന് ജയറാം പറയുന്നു. "കുറേ നേരത്തേക്ക് മറുപടിയൊന്നും വന്നില്ല. ഷൂട്ടിങിന്റെ തിരക്കിലായിരിക്കും എന്ന് കരുതി. പിന്നെ പെട്ടെന്ന് കുറേ മെസേജുകള് ഒരുമിച്ച് വന്നു എന്താടാ ഇത്, നീ തന്നെയാണോ, അതോ തല മാറ്റി ഒട്ടിച്ചതാണോ’ എന്നൊക്കെ", ജയറാം പറഞ്ഞു.
നിന്റെ പരിശ്രമത്തിനുള്ള ഫലമാണ് ഇതെന്നും എന്നും ഇങ്ങനെ ഇരിക്കണമെന്നും മമ്മൂട്ടി പറഞ്ഞെന്നു ജയറാം പറയുന്നു. മമ്മൂട്ടിയിൽ നിന്ന് ലഭിച്ച അഭിപ്രായത്തിന് ശേഷമാണ് ചിത്രം സോഷ്യൽ മീഡിയയിൽ ഷെയർ ചെയ്തതെന്നും താരം പറഞ്ഞു.
നായകനേക്കാള് 'ഫ്രീക്ക്' ആയ അച്ഛൻ കഥാപാത്രത്തെയാണ് ത്രിവിക്രം ശ്രീനിവാസ് സംവിധാനം ചെയ്യുന്ന ചിത്രത്തിൽ ജയറാം അവതരിപ്പിക്കുന്നത്. രണ്ട് മാസം കൊണ്ട് 13 കിലോ ഭാരമാണ് കഥാപാത്രത്തിനുവേണ്ടി കുറച്ചത്. സിനിമയുടെ ചിത്രീകരണം ആരംഭിച്ചെന്നും അടുത്തവർഷം ചിത്രം തിയേറ്ററുകളിൽ എത്തുമെന്നും അദ്ദേഹം പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates