'ഞങ്ങളുടെ ദുല്‍ഖറിനെ തേച്ചിട്ടു പോകാന്‍ എങ്ങനെ തോന്നി,' ആദ്യ സിനിമ ഇറങ്ങിയതു മുതല്‍ കാര്‍ത്തിക മുരളീധരന്‍ കേള്‍ക്കുന്ന ചോദ്യമാണിത്. രണ്ടാമത്തെ ചിത്രം ഇറങ്ങിയിട്ടും ഇപ്പോഴും ആ തേപ്പുകഥ മറക്കാന്‍ മലയാളികള്‍ക്ക് കഴിഞ്ഞിട്ടില്ല. കാര്‍ത്തികയ്ക്ക് അപ്പോള്‍ ഈ കാര്യം കൂടുതല്‍ വ്യക്തമായിട്ടുണ്ടാകും. അങ്കിളിനെക്കുറിച്ച് പറയാന്‍ ലൈവില്‍ വന്ന കാര്‍ത്തികയോട് കൂടുതല്‍ പേരും ചോദിച്ചത് സിഐഎയിലെ തേപ്പു കഥയെക്കുറിച്ച് തന്നെയാണ്. 

അവസാനം ദുല്‍ഖറിനെ തേച്ചതിന് ആരാധകരോട് സോറി പറഞ്ഞിരിക്കുകയാണ് കാര്‍ത്തിക. 'സോറി, ഞാന്‍ മനഃപൂര്‍വം ചെയ്തതല്ല. കേരളത്തില്‍ എന്നല്ല ലോകത്തിലെ ഒരു പെണ്ണും ദുല്‍ക്കര്‍ സല്‍മാനെ വിട്ടുപോകില്ല. പക്ഷേ ഞാന്‍ എന്ത് ചെയ്യാനാ, എന്റെ തിരക്കഥാകൃത്ത് അങ്ങനെ എഴുതിപ്പോയി. സംവിധായകന്‍ പറയുന്നതല്ലേ ചെയ്യാന്‍ പറ്റൂ. അവരെ തേച്ചിട്ട് പോകാന്‍ കഴിയില്ലല്ലോ? കുഞ്ഞിക്കാ ഫാന്‍സിനോട് സോറി പറയുന്നു.' കാര്‍ത്തിക പറഞ്ഞു. 

അമല്‍ നീരദ് സംവിധാനം ചെയ്ത സിഐഎ എന്ന ചിത്രത്തിലൂടെയാണ് കാര്‍ത്തിയ സിനിമയിലേക്ക് അരങ്ങേറ്റം കുറിക്കുന്നത്. അമേരിക്കയിലേക്ക് പോയ തന്റെ കാമുകിയുടെ അടുത്തേക്കുള്ള ഡിക്യുവിന്റെ യാത്രയാണ് ചിത്രത്തിലെ ഇതിവൃത്തം. മമ്മൂട്ടി പ്രധാന വേഷത്തില്‍ എത്തിയ അങ്കിളിലാണ് താരം രണ്ടാമത് അഭിനയിച്ചത്. ജോയ് മാത്യുവിന്റെ സംവിധാനത്തില്‍ ഒരുങ്ങിയ ചിത്രത്തിന് മികച്ച പ്രതികരണമാണ് ലഭിക്കുന്നത്. അങ്കിളിന്റെ പ്രമോഷന്റെ ഭാഗമായാണ് നടി ഫേയ്‌സ്ബുക്ക് ലൈവില്‍ എത്തിയത്.