മലയാളത്തിൽ ശ്രദ്ധേയനായി മാറിയ യുവതാരമാണ് ഷെയ്ൻ നി​ഗം. മിമിക്രി താരം അബിയുടെ മകനെന്ന ലേബലിൽ സിനിമയിലെത്തിയ ഷെയ്ൻ അഭിനയമികവുകൊണ്ട് ശ്രദ്ധേയനായി മാറിയ നടനാണ്. ഷെയ്ൻ നായകനായി  ഒടുവിൽ തിയറ്ററിലെത്തിയ ഇഷ്ക് എന്ന ചിത്രവും മികച്ച വിജയമാണ് സ്വന്തമാക്കിയത്. 

ഇത്തവണ ഒരു അഭ്യർഥനയുമായിട്ടാണ് ഷെയ്ൻ നിഗം എത്തിയിരിക്കുന്നത്. ഫോട്ടോഷൂട്ടിനിടെ നഷ്ടപ്പെട്ട വാച്ച് തിരികെ ലഭിക്കാൻ സഹായിക്കണമെന്നാണ് നടന്റെ ആവശ്യം. ഒരു വാച്ചിൽ എന്തിരിക്കുന്നു എന്ന് ചോദിച്ചാൽ അതെന്റെ എല്ലാമെന്നാണ് ഷെയ്ന്റെ അഭിപ്രായം. വാപ്പച്ചി അബി ഗൾഫ് യാത്രയ്ക്കു ശേഷം സമ്മാനമായി നൽകിയ വാച്ചാണ് താരത്തിന്റെ കൈയിൽ നിന്നു നഷ്ടമായത്. 

ഗൾഫ് യാത്ര കഴിഞ്ഞു വന്നപ്പോഴാണ്  അബി casio edifice എന്ന കമ്പനിയുടെ ബ്രൗൺ സ്ട്രാപ്പുള്ള വാച്ച് മകന് സമ്മാനമായി നൽകിയത്.  മാർച്ചിൽ കളമശ്ശേരിയിലും പരിസര പ്രദേശങ്ങളിലും വച്ച് നടന്ന  വനിതയുടെ കവർ ഷൂട്ടിനിടെ, എവിടെവച്ചോ വാച്ച് കയ്യിൽ നിന്ന് നഷ്ടപ്പെട്ടതാകാം എന്നാണ് ഷെയ്നിന്റെ വിശ്വാസം. അബിയുടെ മരണശേഷം അമൂല്യ നിധി പോലെ കരുതുന്ന വാച്ച് നഷ്ടപ്പെട്ടത് ഷെയ്ന് വലിയ ദുഃഖമായി. ഇതേത്തുടർന്നാണ് വായനക്കാരുടെ സഹായം തേടി താരം രംഗത്തെത്തിയത്.