'പട്ടം പോലെ' എന്ന മലയാള ചിത്രത്തിലൂടെയായിരുന്നു മാളവിക മോഹനന്‍ എന്ന നടിയുടെ രംഗപ്രവേശം. കേരളത്തില്‍ വേരുകളുള്ള മുംബൈക്കാരിയായ ഈ നടി ഇപ്പോള്‍ ബോളിവുഡില്‍ അറിയപ്പെടുന്ന താരമാണ്. ഇപ്പോള്‍ മാളവികയും ബോളിവുഡിലെ യുവനടന്‍ വിക്കി കൗശലുമായി പ്രണയത്തിലാണെന്നാണ് സിനിമാലോകത്ത് നിന്ന് പുറത്തു വരുന്ന വാര്‍ത്തകള്‍. 

ഇരുവരുമൊന്നിച്ചുള്ള ഒരു ഫോട്ടോ ഇന്‍സ്റ്റാഗ്രാമിലൂടെ പ്രചരിക്കുന്നുമുണ്ട്. വിക്കി മാളവികയുടെ മുംബൈയിലെ വസതിയിലെത്തിയിരുന്നെന്ന സൂചന ലഭിക്കുന്ന വീഡിയോയും സോഷ്യല്‍ മീഡിയയില്‍ വൈറലായതോടെ ഇവര്‍ പ്രണയത്തിലാണെന്ന് ഉറപ്പിക്കുകയാണ് ആരാധകര്‍. 

സഹോദരന്‍ സണ്ണി കൗശലിനൊപ്പമാണ് വിക്കി മാളവികയുടെ വീട്ടിലെത്തിയത്. വിക്കിയും സണ്ണിയും മാളവികയുടെ സഹോദരനും ഒരുമിച്ച് ഡൈനിങ് ടേബിളിലില്‍ ഒന്നിച്ചിരിക്കുന്ന വീഡിയോ ആണ് വൈറലാകുന്നത്. മറ്റുള്ളവര്‍ ഭക്ഷണം കഴിക്കുമ്പോള്‍ വിക്കി മാളവികയുടെ അമ്മയ്‌ക്കൊപ്പമിരുന്ന് സംസാരിക്കുന്നതായാണ് വീഡിയോയില്‍. 

വീഡിയോ എടുക്കുന്നത് മാളവികയാണോ എന്നും ആരാധകര്‍ക്ക് സംശയമുണ്ട്. ഇതിനൊപ്പം എടുത്ത ഒരു ഫോട്ടോ കഴിഞ്ഞ ദിവസം മാളവിക ഇന്‍സ്റ്റാഗ്രാം സ്‌റ്റോറിയും ആക്കിയിരുന്നു. 

ഇതിനിടെ വിക്കി കൗശല്‍ ഒരു സുന്ദരിയെ കാണാന്‍ ചെന്നുവെന്ന് ഒരു അഭിമുഖത്തിനിടയില്‍ നടി രാധിക ആപ്‌തെ പറഞ്ഞതായി ടൈംസ് ഓഫ് ഇന്ത്യ റിപ്പോര്‍ട്ട് ചെയ്തിരുന്നു. ആ സുന്ദരി മാളവികയാണോ എന്നാണ് ഇപ്പോള്‍ ആരാധകര്‍ക്ക് അറിയേണ്ടത്. 

അതേസമയം, വിക്കിയും സണ്ണിയും മാളവികയും സഹോദരന്‍ ആദിത്യ മോഹനനും ചെറുപ്പം മുതല്‍ക്കെ ഒന്നിച്ചു കളിച്ചു വളര്‍ന്നവരാണെന്നും ഇപ്പോഴും നല്ല സുഹൃത്തുക്കളായി തുടരുന്നവരാണെന്നുമാണ് ഇരുവരുടെയും അടുത്ത വൃത്തങ്ങള്‍ പറയുന്നത്. 

ഇറാനിയന്‍ സംവിധായകന്‍ മജീദ് മജീദിയുടെ ബിയോണ്ട് ദ ക്ലൗഡ്‌സിലൂടെയാണ് മാളവിക ബോളിവുഡില്‍ ശ്രദ്ധിക്കപ്പെടുന്നത്. തമിഴ് സിനിമ പേട്ടയാണ് അവസാനം അഭിനയിച്ച ചിത്രം.