സംവിധായകൻ, നടൻ, നിർമാതാവ് അങ്ങനെ ആഷിഖ് അബുവിനെ പല വേഷങ്ങളിൽ നാം കണ്ടിട്ടുണ്ട്. എല്ലാ റോളിലും തിളങ്ങാനും ആഷിഖിനായി. ഇപ്പോൾ ഛായാ​ഗ്രഹണം നിർവഹിക്കാൻ ഒരുങ്ങുകയാണ് താരം. റിമ കല്ലിങ്കൽ നായികയായി എത്തുന്ന ഹാ​ഗറിലാണ് ആഷിഖ് ക്യാമറാമാൻ ആകുന്നത്. താരത്തിന്റെ പ്രഖ്യാപനം ആരാധകരെ അമ്പരപ്പിച്ചിരുന്നു. ഇപ്പോൾ ഛായാ​ഗ്രാഹകൻ ആകാനുള്ള കാരണം തുറന്നു പറഞ്ഞിരിക്കുകയാണ് ആഷിഖ് അബു.

സിനിമ ഷൂട്ട് ചെയ്യാൻ ഒരുപാട് നാളായി ആ​ഗ്രഹിക്കുന്നു എന്നാണ് ആഷിഖ് പറയുന്നത്."ഒരു സിനിമ ഷൂട്ട് ചെയ്യാന്‍ ഒരുപാടു കാലമായി ആഗ്രഹിക്കുന്നു. ശ്യാം പുഷ്‍കരന്‍ ഒരു സിനിമ ചെയ്യുമ്പോള്‍ അതിന്‍റെ ഛായാഗ്രഹണം നിര്‍വ്വഹിക്കാമെന്നും കരുതിയിരുന്നു. അതിന് ഇനിയും സമയമെടുത്തേക്കും. അതിനാല്‍ ഈ പ്രതിസന്ധിയുടെ സമയത്ത് ഒന്നു ശ്രമിച്ചുനോക്കാമെന്നു കരുതി"  ടൈംസ് ഓഫ് ഇന്ത്യയ്ക്കു നല്‍കിയ അഭിമുഖത്തിൽ ആഷിഖ് അബു പറഞ്ഞു.

മമ്മൂട്ടി നായകനായി എത്തിയ ഉണ്ടയുടെ തിരക്കഥാകൃത്തുക്കളിൽ ഒരാളായ ഹർഷദാണ് ചിത്രത്തിന്റെ സംവിധായകൻ. ഷറഫുദ്ദീനാണ് നായകനായി എത്തുന്നത്. ആഷിഖ് അബുവും റിമ കല്ലിങ്കലും ചേർന്നാണ് നിർമാണം. ഹര്‍ഷദും രാജേഷ് രവിയും ചേര്‍ന്നാണ് രചന നിര്‍വ്വഹിച്ചിരിക്കുന്നത്.