അമ്മയുടെ ചിത്രം ഏറ്റെടുത്തതിന് മാധുരി ദീക്ഷിതിന് നന്ദി പറഞ്ഞ് ജാന്‍വിയുടെ കുറിപ്പ്. ശ്രീദേവിയെ കേന്ദ്ര കഥാപാത്രമാക്കി കരണ്‍ ജോഹര്‍ നിര്‍മ്മിക്കാനിരുന്ന ചിത്രത്തിലാണ് മാധുരി ദീക്ഷിത് അഭിനയിക്കുന്നത്. അഭിഷേക് വര്‍മ്മനാണ് ചിത്രം സംവിധാനം ചെയ്യുന്നത്. 

അമ്മയുടെ ഹൃദയത്തോട് ചേര്‍ന്ന് നില്‍ക്കുന്ന ചിത്രമായിരുന്നെന്നും ഇതില്‍ ഭാഗമായതിന് മാധുരീജിയോട് അച്ഛനും ഞാനും ഖുശിയും നന്ദി പറയുന്നെന്നും ജാന്‍വി ഇന്‍സ്റ്റഗ്രാമില്‍ കുറിച്ചു. ചിത്രത്തിന് ഷിദ്ദത് എന്ന് പേരിട്ടതായും റിപ്പോര്‍ട്ടുകളുണ്ട്. കരണ്‍ ജോഹറിന്റെ പിതാവ് യാഷ് ജോഹറിന്റേതാണ് ചിത്രത്തിന്റെ ആശയം. 25 വര്‍ഷങ്ങള്‍ക്ക് ശേഷം സഞ്ജയ് ദത്തും ശ്രീദേവിയും ഒരുമിക്കുന്ന ചിത്രമായിരുന്നു ഇത്. ഇവരെ കൂടാതെ സൊനാക്ഷി സിന്‍ഹ, വരുണ്‍ ധവാന്‍, ആലിയ ഭട്ട് എന്നിവരും ചിത്രത്തിലുണ്ട്. 

നീണ്ട ഇടവേളയ്ക്ക് ശേഷമാണ് ശ്രീദേവി സിനിമയിലേക്ക് തിരിച്ചെത്തിയത്. ഇംഗ്ലീഷ് വിംഗ്ലീഷ്, മോം തുടങ്ങിയ ചിത്രങ്ങളിലെ മികച്ച കഥാപാത്രങ്ങളിലൂടെ തന്റെ താരത്തിളക്കം ഊട്ടിഉറപ്പിക്കുമ്പോഴായിരുന്നു താരത്തിന്റെ അകാല മരണം.