ശ്വാസതടസ്സം രൂക്ഷമായതിനെ തുടര്‍ന്ന് ബോളിവുഡ് നടന്‍ സഞ്ജയ് ദത്തിനെ ആശുപത്രിയില്‍ പ്രവേശിപ്പിച്ചു. എന്നാല്‍ താരത്തിന്റെ കോവിഡ് പരിശോധന ഫലം നെഗറ്റീവാണ്. നിലവില്‍ താരത്തിന് പ്രശ്‌നങ്ങളൊന്നുമില്ലെന്നും നീരീക്ഷണത്തില്‍ തുടരുകയാണ്.

ഇന്നലെയാണ് ശ്വാസതടസത്തെ തുടര്‍ന്ന് താരത്തെ മുംബൈയിലെ ലീലാവതി ആശുപത്രിയില്‍ പ്രവേശിപ്പിക്കുന്നത്. താരത്തിന്റെ ആരോഗ്യനിലയെക്കുറിച്ച് അഭ്യൂഹങ്ങള്‍ പരന്നതോടെ വിശദീകരണവുമായി താരം എത്തി. തനിക്ക് പ്രശ്‌നമൊന്നുമില്ലെന്നും നിരീക്ഷണത്തിലാണ് എന്നാണ് അദ്ദേഹം ട്വീറ്റ് ചെയ്തത്. അടുത്ത ദിവസങ്ങളില്‍ വീട്ടിലേക്ക് മടങ്ങുമെന്നും വ്യക്തമാക്കി. താരത്തിന് ശ്വാസതടവും ഓക്‌സിജന്‍ ലെവല്‍ കുറയാനുമുണ്ടായ കാരണമെന്തെന്ന് അറിയുന്നതിനാല്‍ പരിശോധന നടക്കുന്നുണ്ട്.

സഞ്ജയ് ദത്തിന്റെ ഭാര്യയും മക്കളും ലോക്ക്ഡൗണിനെ തുടര്‍ന്ന് വിദേശത്ത് കുടുങ്ങിയിരിക്കുകയാണ്. ജൂലൈ 29 നാണ് താരം 61ാം പിറന്നാള്‍ ആഘോഷിച്ചത്. തെന്നിന്ത്യന്‍ സൂപ്പര്‍ഹിറ്റ് ചിത്രം കെജിഎഫിന്റെ രണ്ടാം ഭാഗമാണ് സഞ്ജയ് ദത്തിന്റെ പുതിയ ചിത്രം. വില്ലന്‍ റോളിലാണ് താരം എത്തുന്നത്.