കോവിഡ് പ്രതിസന്ധിയെത്തുടർന്ന് പുതിയ ജോലികൾ കണ്ടെത്തിയ ബോളിവുഡ് നടന്മാരെയടക്കം പ്രേക്ഷകർ കണ്ടതാണ്. എന്നാലിതാ മലയാളത്തിലും ഒരു താരം ആ മാർ​ഗ്​ഗം സ്വീകരിച്ചിരിക്കുകയാണ്. നടൻ ശിവദാസ് മട്ടന്നൂരാണ് പച്ചക്കറി വ്യാപാരം ആരംഭിച്ചത്. ഷൂട്ടിങും സ്റ്റേജ് പരിപാടികളും മുടങ്ങിയപ്പോൾ ജീവിതം മുന്നോട്ടുപോകാനാണ് നടൻ ഈ വഴി തിരഞ്ഞെടുത്തത്.

ശിവദാസിനൊപ്പം നാടക കലാകാരൻ സതീഷ് കൊതേരിയും സുഹൃത്തുക്കളുമുണ്ട്. കൊതേരിയിലെ കടയിൽ കച്ചവടം നടത്തുന്നതിന് പുറമേ കീഴല്ലൂർ പഞ്ചായത്ത് പരിതിയിലുള്ള വീടുകളിൽ പച്ചക്കറി വണ്ടിയുമായും ശിവദാസും സംഘവും എത്താറുണ്ട്.

പുലർച്ചെ മൂന്ന് മണിക്ക് മാർക്കറ്റിലെത്തിയാണ് വിൽപനയ്ക്കുള്ള പച്ചക്കറികൾ ശേഖരിക്കുന്നത്. വൈകിട്ട് ആറുവരെ നടത്തുന്ന വിൽപനയിൽ നിന്ന് ലഭിക്കുന്ന ലാഭവിഹിതത്തിന്റെ ഒരു പങ്ക് വിഷമതകൾ നേരിടുന്ന കലാകാരന്മാരുടെ കുടുംബത്തിന് സഹായമായി നൽകാനും ഇവർ ലക്ഷ്യമിടുന്നു.