സംവിധായകൻ എസ് എൽ പുരം ആനന്ദ് അന്തരിച്ചു. 76 വയസ്സായിരുന്നു. വാർധക്യസഹജമായ അസുഖത്തെത്തുടർന്ന് ചികിത്സയിലായിരുന്നു. ഇന്ന് രാവിലെ പത്തുമണിക്കാണ് സംസ്കാരം. 

പ്രൊഡക്‌ഷൻ എക്സിക്യുട്ടീവും നടനും സംവിധായകനുമൊക്കെയായി സിനിമയിൽ നിറഞ്ഞുനിന്ന ആനന്ദ് എം ജി ആർ മുതൽ മോഹൻലാൽ വരെയുള്ള അഭിനേതാക്കളുമായി ഏറെ അടുപ്പം സൂക്ഷിച്ചിരുന്നു. ആലിലക്കുരുവികൾ, ആറ്റിനക്കരെ എന്നീ സിനിമകൾ സംവിധാനം ചെയ്തിട്ടുണ്ട്. 

സിനിമാ നിർമ്മാണക്കമ്പനികളായ ഉദയയിലും നവോദയയിലും പ്രൊഡക്‌ഷൻ എക്സിക്യുട്ടീവായിരുന്നു ആനന്ദ്. മഞ്ഞിൽ വിരിഞ്ഞ പൂക്കൾ, മൈ ഡിയർ കുട്ടിച്ചാത്തൻ, പടയോട്ടം തുടങ്ങിയ ശ്രദ്ധേയ ചിത്രങ്ങളുടെ പിന്നണിയിൽ പ്രവർത്തിച്ചിട്ടുണ്ട്. സിനിമാ സംവിധായകനായി തിളങ്ങിയ ആനന്ദ് പന്ത്രണ്ടോളം സിനിമകളിൽ അഭിനയിച്ചിട്ടുമുണ്ട്.