മഞ്ജു വാര്യരുടെ സഹോദരനും നടനുമായ മധു വാര്യര്‍ ആദ്യമായി സംവിധാനം ചെയ്യുന്ന ചിത്രത്തിന്റെ പേര് പുറത്തുവിട്ടു. ലളിതം സുന്ദരം എന്ന് പേരിട്ടിരിക്കുന്ന ചിത്രത്തില്‍ മഞ്ജു വാര്യരും ബിജു മേനോനുമാണ് പ്രധാന വേഷങ്ങളില്‍ എത്തുന്നത്.

മമ്മൂട്ടിയും മോഹന്‍ലാലും ചേര്‍ന്നാണ് ചിത്രത്തിന്റെ മോഷന്‍ പോസ്റ്റര്‍ പുറത്തിറക്കിയത്. സെഞ്ച്വറിയുടെ സഹകരണത്തോടെ മഞ്ജു വാര്യര്‍ പ്രൊഡക്ഷന്‍സാണ് ചിത്രം നിര്‍മിക്കുന്നത്. സിനിമയുടെ ചിത്രീകരണം ഉടന്‍ ആരംഭിക്കുമെന്നാണ് പുറത്തുവരുന്ന റിപ്പോര്‍ട്ടുകള്‍. പ്രമോദ് മോഹനാണ് തിരക്കഥ ഒരുക്കിയിരിക്കുന്നത്. ബിജിപാലാണ് സംഗീതം.

സിനിമയില്‍ എങ്ങുമെത്താതെ സ്ട്രഗിള്‍ ചെയ്യുന്ന ചേട്ടനെക്കുറിച്ച് മഞ്ജു വാര്യര്‍ പറഞ്ഞിരുന്നു. ഒരു പാട് വര്‍ഷമായി സിനിമയുടെ പിന്നാലെയുണ്ടെന്നും ഉണ്ടായിരുന്ന ജോലി ഉപേക്ഷിച്ചതുപോലും സിനിമയോടുള്ള ഇഷ്ടം കൊണ്ടായിരുന്നു എന്നുമാണ് മഞ്ജു പറഞ്ഞത്.

മഞ്ജുവിന്റെ രണ്ടാം വരവിന് ശേഷം ബിജു മേനോനൊപ്പം ഒന്നിക്കുന്ന ആദ്യ സിനിമയെന്ന പ്രത്യേകതയും ലളിതം സുന്ദരത്തിനുണ്ട്. ഇരുവരും ഒന്നിച്ച സിനിമകളെല്ലാം സൂപ്പര്‍ഹിറ്റായിരുന്നു. ഇപ്പോള്‍ മമ്മൂട്ടി ചിത്രം ദി പ്രീസ്റ്റില്‍ അഭിനയിക്കുകയാണ് മഞ്ജു.