ഹൈദരാബാദ്: മാധ്യമപ്രവര്‍ത്തക ശ്വേത റെഡ്ഡിക്ക് പിന്നാലെ തെലുങ്ക് ബിഗ്‌ബോസിന്റെ അണിയറ പ്രവര്‍ത്തകര്‍ക്കെതിരെ പരാതിയുമായി നടി ഗായത്രി ഗുപ്ത. ഷോയിലെ കാസ്റ്റിങ് കൗച്ചിനെതിരെയാണ് നടി പൊലീസില്‍ പരാതി നല്‍കിയിരിക്കുന്നത്.
രണ്ടര മാസങ്ങള്‍ക്ക് മുന്‍പ് ഷോയില്‍ തന്നോട് പങ്കെടുക്കാന്‍ ആവശ്യപ്പെട്ടു. എന്നാല്‍ സമ്മതം കൂടാതെ കരാറില്‍ നിന്ന് തന്നെ ഒഴിവാക്കിയെന്നും ഗായത്രി പറയുന്നു. ബിഗ് ബോസിന്റെ അണിയറ പ്രവര്‍ത്തകരില്‍ ഒരാള്‍ സെക്‌സില്ലാതെ 100 ദിവസം ഞാന്‍ എങ്ങനെ ജീവിക്കുമെന്ന് ചോദിച്ച് പരിഹസിച്ചുവെന്നും ഗായത്രി പരാതിയില്‍ പറഞ്ഞു. റായ്ദുര്‍ഗം പൊലീസ് സ്‌റ്റേഷനിലാണ് നടി പരാതി നല്‍കിയിരിക്കുന്നത്.
'മാര്‍ച്ച് 19നാണ് രഘു എന്നയാള്‍ എന്നെ വിളിച്ച് ബിഗ്‌ബോസ് സീസണ്‍3 യില്‍ സെലക്ടായ കാര്യം പറയുന്നത്. ജൂലൈ മൂന്നാം വാരത്തിലാണ് ഷോ തുടങ്ങുന്നത്. പിന്നീട് ഫിലിംനഗറിലെ ഹോട്ടലില്‍ സാമ്പത്തിക ഇടപാടുകളെക്കുറിച്ച് സംസാരിക്കാന്‍ ക്ഷണിച്ചു. ഷോയില്‍ പങ്കെടുക്കുന്നതിനാല്‍ 100 ദിവസം ഏത് സിനിമാ ഓഫറുകളും സ്വീകരിക്കരുതെന്ന് അവര്‍ പറഞ്ഞു.
ഒരാഴ്ച്ചയ്ക്ക് ശേഷം ഷോയെക്കുറിച്ചുള്ള അവസാനഘട്ട വിശദീകരണം നല്‍കാന്‍ രഘു, അഭിഷേക്, രവികാന്ത് എന്നിവര്‍ എന്റെ വീട്ടിലെത്തി. അതില്‍ ഒരാള്‍ 'സെക്‌സില്ലാതെ ബിഗ്‌ബോസ് ഹൗസില്‍ 100 ദിവസം നിങ്ങള്‍ എങ്ങനെ ജീവിക്കും' എന്ന് ചോദിച്ചു.ബോസിനെ തൃപ്തിപ്പെടുത്താന്‍ എന്ത് ചെയ്യാന്‍ സാധിക്കുമെന്നും ചോദിച്ചു. എന്നാല്‍ ആരാണ് ബോസ് എന്ന് വ്യക്തമാക്കിയിട്ടില്ല എന്നും പരാതിയില്‍ പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates