സെല്‍ഫിയെടുക്കാന്‍ അടുത്തുചെന്ന പത്ത് വയസുകാരന്റെ മൊബൈല്‍ ഫോണ്‍ തെലുങ്ക് നടിയും ടെലിവിഷന്‍ അവതാരകയുമായ അനസൂയ വലിച്ചെറിഞ്ഞ് പൊട്ടിച്ചുവെന്ന് പരാതി. സോഷ്യല്‍ മീഡിയയില്‍ പോസ്റ്റ് ചെയ്ത വീഡിയോയിലൂടെ കുട്ടിയുടെ അമ്മയാണ് നടിക്കെതിരേ പരാതിയുമായി രംഗത്തെത്തിയത്. സംഭവത്തില്‍ നടിക്കെതിരേ അമ്മ പൊലീസില്‍ പരാതി നല്‍കി. 

മകനൊപ്പം നിന്ന് പൊട്ടിയ ഫോണ്‍ കാണിച്ചു കൊണ്ടുള്ള അമ്മയുടെ വീഡിയോ ഇതിനോടകം വൈറലായിരിക്കുകയാണ്. ബന്ധുവിന്റെ വീട്ടില്‍ എത്തിയതായിരുന്നു അനസൂയ. ഈ സമയത്ത് താരത്തിനൊപ്പം ഫോട്ടോ എടുക്കണമെന്ന ആവശ്യമായി കുട്ടി അടുത്തെത്തി. തിരക്കിലായിരുന്ന നടി ഫോട്ടോ എടുക്കാന്‍ നില്‍ക്കാതെ കാറില്‍ കയറുകയും ഫോണ്‍ എറിഞ്ഞുടയ്ക്കുകയും ചെയ്‌തെന്നും അമ്മ ആരോപിച്ചു. 

എന്നാല്‍ താന്‍ ഫോണ്‍ എടുത്ത് എറിഞ്ഞിട്ടില്ലെന്നാണ് നടി പറയുന്നത്. 'വീട്ടില്‍ നിന്ന് ഇറങ്ങുമ്പോള്‍ സ്ത്രീകളും കുട്ടികളും ചിത്രം എടുക്കണമെന്ന് പറഞ്ഞു. വളരെ മാന്യമായാണ് അവരുടെ ആവശ്യം നിഷേധിച്ചത്. പക്ഷേ അവര്‍ കൂടുതല്‍ അടുത്തേക്ക് വന്നപ്പോള്‍ താന്‍ മുഖം മറച്ച് കാറില്‍ കയറി. അതിനിടെ ഫോണിന് എന്തു പറ്റിയെന്ന് എനിക്കറിയില്ല. മനഃപൂര്‍വം ഒന്നും തെയ്തിട്ടില്ല' - അനസൂയ പറഞ്ഞു. സംഭവം വിവാദമായതോടെ നടിയെ വിമര്‍ശിച്ച് നിരവധിപേരാണ് രംഗത്തെത്തിയത്.