സമൂഹത്തില്‍ സ്ത്രീകളോളം മനശക്തിയുള്ളവര്‍ ആരുമില്ലെന്ന് നടി മഞ്ജു വാര്യര്‍. പുതിയ ചിത്രം പ്രതി പൂവന്‍കോഴിയുടെ പ്രചാരണത്തിന്റെ ഭാഗമായി സംസ്ഥാനത്തിന്റെ വിവിധ സ്ഥലങ്ങളില്‍ നിന്നുള്ള സെയില്‍ ഗേള്‍സുമായി നടത്തിയ സംവാദത്തിലായിരുന്നു താരത്തിന്റെ പ്രതികരണം. റോഷന്‍ ആന്‍ഡ്രൂസ് സംവിധാനം ചെയ്യുന്ന ചിത്രത്തില്‍ സെയില്‍സ് ഗേളായാണ് താരം വേഷമിടുന്നത്. 

വ്യക്തിപരമായ പ്രശ്‌നങ്ങള്‍ ഉള്‍പ്പടെ തരണം ചെയ്ത് മുന്നോട്ടു പോകുന്നത് എങ്ങനെയാണ് എന്ന ഒരു സെയില്‍സ് ഗേളിന്റെ ചോദ്യത്തിനുള്ള മറുപടിയായാണ് താരം സ്ത്രീകളുടെ മനശക്തിയെക്കുറിച്ച് പറഞ്ഞത്. 'എന്തു ബുദ്ധിമുട്ടുള്ള പ്രശ്‌നം വന്നാലും അതിനെ അഭിമുഖീകരിച്ച് അതില്‍ നിന്ന് പുറത്തുവരാനുള്ള ഒരു ഇന്‍ബോണ്‍ ആയുള്ള ഒരു ശക്തി എല്ലാ സ്ത്രീകളിലും ഉണ്ട്. എന്നിലും നിങ്ങളിലും എല്ലാമുണ്ട്' മഞ്ജു പറഞ്ഞു. 

അമ്മ ഗിരിജ വാര്യര്‍ക്കൊപ്പമാണ് മഞ്ജു പരിപാടിയില്‍ പങ്കെടുക്കാന്‍ എത്തിയത്. കൂടാതെ പ്രതിപൂവന്‍ കോഴിയുടെ അണിയറ പ്രവര്‍ത്തകരും പരിപാടിയില്‍ പങ്കെടുത്തു. ചിത്രത്തിന്റെ സംവിധായകന്‍ റോഷന്‍ ആന്‍ഡ്രൂസ് തന്നെയാണ് വില്ലനായി എത്തുന്നത്. ചിത്രത്തിന്റെ ഗാനവും ട്രെയിലറുമെല്ലാം ശ്രദ്ധ നേടിയിരുന്നു.