റിയാലിറ്റി ഷോയിലൂടെ ശ്രദ്ധേയനായ ​ഗായകൻ ഇമ്രാൻ ഖാന് നൽകിയ വാക്ക് ഒട്ടും വൈകാതെ നിറവേറ്റിയിരിക്കുകയാണ് ​സം​ഗീത സംവിധായകൻ ഗോപി സുന്ദർ. ഉപജീവനത്തിനായി ഓട്ടോ ഓടിക്കുന്ന ഇമ്രാന്റെ വണ്ടിയിൽ യാത്രക്കാരനായി എത്തിയാണ് ​ഗോപി സിനിമയിൽ പാടാൻ ക്ഷണിച്ചത്. ഇപ്പോഴിതാ പാട്ടിന്റെ റെക്കോർഡിങ് പൂർത്തിയാക്കിയ സന്തോഷം ​ഗോപി പങ്കുവച്ചു. 

“ഞങ്ങളുടെ റെക്കോർഡിംഗ് സെഷൻ പൂർത്തിയാക്കി. പ്രതിഭാധനനായ ഇമ്രാൻ ഖാനുമായി ഒന്നിച്ചത് അത്ഭുതകരമായ അനുഭവമായിരുന്നു. ഞങ്ങളെ നിങ്ങളുടെ പ്രാർത്ഥനയിൽ നിലനിർത്തുക. ഞങ്ങൾ ഒരു മനോഹരമായ പാട്ടിന്റെ ആദ്യ വരിയുമായി വരുന്നു - സംഗീതമേ…..” ​ഒന്നിച്ചുള്ള ചിത്രങ്ങൾ പങ്കുവച്ച് ​ഗോപി സുന്ദർ കുറിച്ചു. ഇതിനുപിന്നാലെ ​ഗാനത്തിന്റെ വരികളും അദ്ദേഹം ഫേസ്ബുക്ക് പേജിലൂടെ പങ്കുവയ്ക്കുകയുണ്ടായി. 

ഒരു യാത്രികനായി ഇമ്രാന്റെ ഓട്ടോയിൽ കയറിയാണ് യുവ​ഗായകനെ ​ഗോപി സുന്ദർ ഞെട്ടിച്ചത്. മാസ്കും കൂളി​ഗ് ​ഗ്ലാസും തൊപ്പിയും ധരിച്ച് വഴിയിൽ നിന്നാണ് ​ഗോപി സുന്ദർ കയറിയത്. ഇടയ്ക്ക് വച്ച് ചായ കുടിക്കാൻ നിർത്തിയ ശേഷം സൗഹൃദ സംഭാഷണത്തിനിടെയാണ് തന്റെ പേര് ഇമ്രാനോട് ​ഗോപി സുന്ദർ വെളിപ്പെടുത്തിയത്. എന്താണ് നടക്കുന്നതെന്ന് ആദ്യം ഇമ്രാന് മനസിലായില്ല. തന്റെ സം​ഗീത യാത്ര തുടങ്ങിയ പള്ളിക്ക് മുന്നിൽ വച്ചുതന്നെയായിരുന്നു സിനിമയിൽ പാടാനുള്ള അവസരം ഇമ്രാനെ തേടിയെത്തിയത്. പാട്ടിനുള്ള അഡ്വാൻസും നൽകാനും ​ഗോപി സുന്ദർ അന്ന് മറന്നില്ല. ‌

അടുത്തിടെ ഒരു സം​ഗീത റിയാലിറ്റി ഷോയിൽ ഇമ്രാൻ അതിഥിയായി എത്തിയിരുന്നു. അന്ന് ജഡ്ജിങ്ങ് പാനലിലുണ്ടായിരുന്ന സം​ഗീത സംവിധായകൻ ​ഗോപി സുന്ദർ ഇമ്രാന് ഒരു പാട്ട് വാ​ഗ്ദാനം ചെയ്യുകയും ചെയ്തിരുന്നു. ​ഗോപിയുടെ വിളി പ്രതീക്ഷിച്ച് ഇരിക്കുകയായിരുന്നെങ്കിലും ഇത്രപെട്ടെന്ന് അതും നേരിട്ടെത്തി അവസരം വാ​ഗ്ദാനം ചെയ്യുമെന്ന് ഒരിക്കലും കരുതിയിരുന്നില്ല എന്നാണ് ഇമ്രാൻ പറയുന്നത്.