ദുബൈ: അസ്ഥിരമായ കാലാവസ്ഥയിൽ വലഞ്ഞ ജനങ്ങൾക്ക് സഹായഹസ്തവുമായി ദുബൈ പൊലീസ്. തിങ്കൾ മുതൽ വെള്ളിവരെ ദിവസങ്ങളിൽ ദുബൈ പൊലീസിന്റെ കമാൻഡ് ആൻഡ് കൺട്രോൾ സെന്ററിൽ ലഭിച്ചത് 56,608 അടിയന്തര കോളുകൾ. അതിൽ 97 ശതമാനം കോളുകൾക്കും വെറും 10 സെക്കൻഡിനുള്ളിൽ മറുപടി നൽകിയതായി ഉദ്യോഗസ്ഥർ പറഞ്ഞു.

തിങ്കളാഴ്ച രാവിലെ ആറ് മുതൽ വെള്ളിയാഴ്ച രാവിലെ ആറ് മണിവരെയാണ് ഈ കോളുകൾ ലഭിച്ചത്. എല്ലാ ദിവസങ്ങളിലും 24 മണിക്കൂറും പ്രവർത്തനനിരതമായിരുന്നു ഈ കൺട്രോൾ സെന്റർ.

തിങ്കളാഴ്ച രാവിലെ ആറ് മണി മുതൽ വെള്ളിയാഴ്ച രാവിലെ ആറ് മണി വരെ 999 ഹോട്ട്‌ലൈൻ വഴി ലഭിച്ച റിപ്പോർട്ടുകളോട് പ്രതികരിക്കുന്നതിനായി കമാൻഡ് ആൻഡ് കൺട്രോൾ സെന്ററിലെ കോൾ ഹാൻഡ്‌ലർമാർ 24 മണിക്കൂറും പ്രവർത്തിച്ചു.

സംഭവങ്ങൾ വേഗത്തിൽ വിലയിരുത്തിയ ടീമുകൾ, പ്രശ്ന ബാധിത പ്രദേശങ്ങളിൽ വെള്ളം കെട്ടിക്കിടക്കുന്നത് ഉൾപ്പെടെയുള്ള അടിയന്തര സാഹചര്യങ്ങൾ കൈകാര്യം ചെയ്യുന്നതിനായി പട്രോളിങ് ഉൾപ്പടെ പ്രത്യേക യൂണിറ്റുകളും അയച്ചു.

പ്രതികൂല സാഹചര്യങ്ങളിൽ പൊതുജന സുരക്ഷ നിലനിർത്തുന്നതിൽ കേന്ദ്രത്തിന്റെ നിർണായക പങ്കിനെ ഈ കണക്കുകൾ ഉറപ്പിക്കുന്നുവെന്ന് ഉദ്യോഗസ്ഥർ പറഞ്ഞു.

ദുബൈ പൊലീസിന്റെ അടിയന്തര മാനേജ്‌മെന്റ് സിസ്റ്റത്തിന്റെ "ഹൃദയം തുടിക്കുന്ന" സംവിധാനമെന്നാണ് ഇതിനെ കമാൻഡ് ആൻഡ് കൺട്രോൾ സെന്റർ ഡയറക്ടർ ബ്രിഗേഡിയർ തുർക്കി ബിൻ ഫാരെസ് വിശേഷിപ്പിച്ചത്.

നൂതന സാങ്കേതികവിദ്യകളിലൂടെ ഫീൽഡ് പ്രവർത്തനങ്ങളുടെ തത്സമയ നിരീക്ഷണം ശക്തമാക്കുന്നു, ഇത് അപകടങ്ങളിൽ വേഗത്തിലും കാര്യക്ഷമമായും പ്രതികരിക്കാൻ ടീമുകളെ സഹായിക്കുന്നു, അതോടൊപ്പം ജീവനും സ്വത്തിനും സംരക്ഷണം നൽകുന്നുവെന്നും അദ്ദേഹം പറഞ്ഞു.

എമിറേറ്റിലുടനീളമുള്ള തത്സമയ ഹൈ-റെസല്യൂഷൻ ഫീഡുകൾ, ഓപ്പറേഷണൽ ഡേറ്റ, വാർത്ത കാണുക എന്നിവയ്ക്കായി വലിയൊരു സ്‌ക്രീൻ സെന്ററിലുണ്ട്. വയർലെസ് ആശയവിനിമയം വഴി തത്സമയ ഏകോപനം നടത്തുന്നു. ഇതിനായി ജിപിഎസ് സംവിധാനം ഉളള ഉപകരണങ്ങൾ ഉപയോഗിച്ച് പട്രോളിങ് സ്ഥലങ്ങൾ തത്സമയം ട്രാക്ക് ചെയ്യുന്നു.

ആവശ്യമുള്ളതിന് ഏറ്റവും അടുത്തുള്ള പട്രോളിങ് സംഘങ്ങളെ കാലതാമസമില്ലാതെ അയയ്ക്കുന്നുണ്ടെന്ന് സെന്റർ ഉറപ്പാക്കുകയും ദുബൈ സിവിൽ ഡിഫൻസ്, ദുബൈ കോർപ്പറേഷൻ ഫോർ ആംബുലൻസ് സർവീസസ്, ദുബൈ മുനിസിപ്പാലിറ്റി എന്നിവരുമായി ചേർന്ന് ഉടനടി നടപടികൾ സ്വീകരിക്കുകയും ചെയ്യുന്ന നിലയിലാണ് പ്രവർത്തനം ഏകോപിപ്പിച്ചത്.