ഇറാൻ ആക്രമണവുമായി ബന്ധപ്പെട്ട നിലനിൽക്കുന്ന സംഘർഷാവസ്ഥയുടെ പശ്ചാത്തലത്തിൽ മാർച്ച് നാല് ബുധനാഴ്ച വരെ രാജ്യവ്യാപകമായി എല്ലാ പൊതു, സ്വകാര്യ സ്കൂളുകളിലെയും സർവകലാശാലകളിലെയും പഠനം റിമോട്ട് ലേണിങ് മാതൃകയിലായിരിക്കുമെന്ന് യുഎഇ അറിയിച്ചു.

ഇത് വിദ്യാർത്ഥികൾക്കും, വിദ്യാഭ്യാസ ജീവനക്കാർക്കും, അഡ്മിനിസ്ട്രേറ്റീവ് ഉദ്യോഗസ്ഥർക്കും ബാധകമായിരിക്കുമെന്ന് യുഎഇ വിദ്യാഭ്യാസ മന്ത്രാലയവും ഉന്നത വിദ്യാഭ്യാസ, ശാസ്ത്ര ഗവേഷണ മന്ത്രാലയവും പ്രഖ്യാപിച്ചു.

വിദ്യാഭ്യാസ പ്രവർത്തനങ്ങളുടെ തുടർച്ചയ്ക്കും വിദ്യാർത്ഥികളുടെയും വിദ്യാഭ്യാസ ജീവനക്കാരുടെയും സുരക്ഷ ഉറപ്പാക്കുന്നതിനുമുള്ള നടപടികൾ ബന്ധപ്പെട്ട അധികാരികൾ സ്ഥിരീകരിച്ചിട്ടുണ്ട്, കൂടുതൽ അപ്‌ഡേറ്റുകൾക്കായി എല്ലാവരും ഔദ്യോഗിക സംവിധാനങ്ങൾ പരിശോധിക്കണമെന്ന് അധികൃതർ പറഞ്ഞു.

ഇറാനെതിരെ അമേരിക്കയും ഇസ്രായേലും നടത്തിയ ആക്രമണങ്ങളെത്തുടർന്ന് സംഘർഷങ്ങൾക്കിടയിൽ ഖത്തർ, ബഹ്‌റൈൻ തുടങ്ങിയ രാജ്യങ്ങൾ റിമോട്ട് ലേണിങ്ങിലേക്ക് മാറിയിരുന്നു.

താൽക്കാലികവും മുൻകരുതൽ നടപടിയും എന്ന നിലയിൽ, ബഹ്‌റൈനിലെ എല്ലാ വിദ്യാഭ്യാസ സ്ഥാപനങ്ങളും കഴിഞ്ഞ ദിവസം മുതൽ റിമോട്ട് ലേണിങ്ങിലേക്ക് മാറിയിരുന്നു. ഇനിയൊരു അറിയിപ്പ് ഉണ്ടാകുന്നതുവരെ വിദൂര പഠനം തുടരുമെന്ന് ബഹ്‌റൈൻ വിദ്യാഭ്യാസ മന്ത്രാലയം അറിയിച്ചു.

ഞായറാഴ്ച മുതൽ റിമോട്ട് ലേണിങ്ങിലേക്കുള്ള മാറ്റം ഖത്തറിലെ വിദ്യാഭ്യാസ മന്ത്രാലയം പ്രഖ്യാപിച്ചിരുന്നു.