അബുദാബി: അബുദാബി ബിഗ് ടിക്കറ്റിന്റെ ഈ മാസത്തെ ആദ്യ പ്രതിവാര നറുക്കെടുപ്പില്‍ ഇന്ത്യക്കാര്‍ക്ക് നേട്ടം. ഒരു ലക്ഷം ദിര്‍ഹം (ഏകദേശം 26 ലക്ഷത്തിലേറെ രൂപ) സമ്മാനത്തുക പങ്കിട്ടെടുത്ത നാല് ഭാഗ്യശാലികളില്‍ രണ്ട് പേരും ഇന്ത്യക്കാരാണ്. മലയാളിയായ ജവാദ് നസീറും ബാംഗ്ലൂര്‍ സ്വദേശിയായ വിനയ് പുതുമനയുമാണ് ഭാഗ്യശാലികള്‍.

മലേഷ്യ, ബംഗ്ലാദേശ് സ്വദേശികളാണ് മറ്റ് രണ്ട് വിജയികള്‍. വിജയികള്‍ക്ക് ഓരോരുത്തര്‍ക്കും 25,000 ദിര്‍ഹം (ആറര ലക്ഷത്തോളം രൂപ) വീതം സമ്മാനമായി ലഭിക്കും.

ഖത്തറിലെ പൊതുഗതാഗത മേഖലയില്‍ ജോലി ചെയ്യുകയാണ് മലയാളിയായ ജവാദ് നസീര്‍. (39) കഴിഞ്ഞ നാല് വര്‍ഷമായി ഖത്തറിലുള്ള ജവാദിന്റെ കുടുംബം നാട്ടിലാണ്. വാര്‍ത്തകളിലൂടെ ബിഗ് ടിക്കറ്റിനെക്കുറിച്ച് അറിഞ്ഞ ജവാദ്, കഴിഞ്ഞ മൂന്ന് വര്‍ഷമായി തന്റെ 20 സുഹൃത്തുക്കള്‍ക്കൊപ്പം ചേര്‍ന്നാണ് ടിക്കറ്റെടുക്കുന്നത്. വിജയിയാണെന്ന് അറിയിച്ചുകൊണ്ടുള്ള ഫോണ്‍ കോള്‍ വന്നപ്പോള്‍ വിശ്വസിക്കാനായില്ലെന്നും തങ്ങള്‍ സുഹൃത്തുക്കള്‍ ഈ തുക പങ്കിട്ടെടുക്കുമെന്നും ജവാദ് പറഞ്ഞു.

15 വര്‍ഷമായി ദുബായില്‍ സ്ഥിരതാമസമാക്കിയ ബാംഗ്ലൂര്‍ സ്വദേശി വിനയ് പുതുമനയ്ക്കും ഇത് സന്തോഷ നിമിഷമാണ്. അഞ്ച് വര്‍ഷമായി ബിഗ് ടിക്കറ്റില്‍ ഭാഗ്യം പരീക്ഷിക്കുന്ന വിനയ് ആദ്യം സുഹൃത്തുക്കള്‍ക്കൊപ്പമാണ് ടിക്കറ്റെടുത്തിരുന്നത്. എന്നാല്‍ പിന്നീട് സ്വന്തമായി ടിക്കറ്റെടുത്തു തുടങ്ങി. ഓണ്‍ലൈനിലൂടെ എടുത്ത 037772 എന്ന ടിക്കറ്റാണ് വിനയിനെ തുണച്ചത്. ഈ സമ്മാനത്തുക എന്തിന് ഉപയോഗിക്കണമെന്ന് തീരുമാനിച്ചിട്ടില്ലെങ്കിലും, അടുത്ത തവണത്തെ 2 കോടി ദിര്‍ഹത്തിന്റെ (20 ദശലക്ഷം) ഗ്രാന്‍ഡ് പ്രൈസാണ് തന്റെ അടുത്ത ലക്ഷ്യമെന്ന് വിനയ് പറഞ്ഞു.