ന്യൂഡല്‍ഹി: സാമ്പത്തിക ആശ്വാസ പാക്കേജ് അടിയന്തിരമായി പ്രഖ്യാപിക്കണമെന്ന് ആവശ്യപ്പെട്ട് കോണ്‍ഗ്രസ് പ്രവര്‍ത്തക സമിതി അംഗം എ കെ ആന്റണി. സാമ്പത്തിക ആശ്വാസ പാക്കേജ് പ്രഖ്യാപനം വൈകുന്നത് ആശങ്കയുണ്ടാക്കുമെന്നും ഈ സ്ഥിതി തുടര്‍ന്നാല്‍ പട്ടിണിയും ദാരിദ്യവും ഇനിയും വര്‍ധിക്കുമെന്നും അദ്ദേഹം പറഞ്ഞു. 

ലോക്ഡൗൺ സംബന്ധിച്ച് തീരുമാനം എടുക്കാനുള്ള അധികാരം കേന്ദ്രസര്‍ക്കാരിനു മാത്രമാണെന്നും എല്ലാവരും അതനുസരിക്കണമെന്നും ആന്റണി പറഞ്ഞു. എന്നാൽ ലോക്ഡൗണ്‍ നീളുംതോറും ജനങ്ങളുടെ ദുരിതവും കഷ്ടപ്പാടും വര്‍ധിച്ചുകൊണ്ടിരിക്കുന്നു എന്നും അദ്ദേഹം കൂട്ടിച്ചേർത്തു. ലോക്ഡൗണ്‍ മൂലം ബുദ്ധിമുട്ടുന്ന എല്ലാ ജനവിഭാഗങ്ങള്‍ക്കും സഹായമാകുന്നതരത്തില്‍ സാമ്പത്തിക ആശ്വാസ പാക്കേജ് അടിയന്തിരമായി പ്രഖ്യാപിക്കണമെന്നും പാക്കേജ് ഓരോരുത്തര്‍ക്കും എത്തുന്നുണ്ടെന്ന് ഉറപ്പുവരുത്തണമെന്നും അദ്ദേഹം പറഞ്ഞു. 

ക്യാന്‍സര്‍ രോഗികള്‍, വൃക്ക രോഗികള്‍, കിഡ്‌നി രോഗികള്‍, ഹൃദ്രോഗികള്‍ തുടങ്ങിയവര്‍ക്ക് ലഭിച്ചു കൊണ്ടിരിക്കുന്ന ചികിത്സ തുടര്‍ന്നും ലഭിക്കാൻ വേണ്ട നടപടികൾ സ്വീകരിക്കണമെന്നും സംസ്ഥാന സര്‍ക്കാരുകളുമായി ആലോചിച്ച് ഇതിന് അടിയന്തിര പരിഹാരം ഉണ്ടാക്കണമെന്നും ആന്റണി ആവശ്യപ്പെട്ടു.