ഭുവനേശ്വർ: ഒഡിഷയിൽ ഉപേക്ഷിക്കപ്പെട്ട കിണറിനുള്ളിൽ നിന്ന് കൂറ്റൻ രാജവെമ്പാലയെ കണ്ടെത്തി. ഒഡിഷയിലെ മയൂർഭഞ്ച് ജിലയിലുള്ള ഖുന്ദായിലാണ് സംഭവം. കഴിഞ്ഞ ദിവസം രാവിലെയാണ് കിണറിനുള്ളിൽ രാജവെമ്പാലയെ കണ്ടെത്തിയത്. 

ഗ്രാമവാസികളാണ് കിണറിൽ രാജവെമ്പാല ഉള്ള കാര്യം വനംവകുപ്പിനെ അറിയിച്ചത്. ഇവരെത്തി പാമ്പിനെ പുറത്തെടുത്തു. ഏറെ നേരത്തെ പരിശ്രമത്തിനു ശേഷമാണ് കിണറിനുള്ളിൽ നിന്നു പാമ്പിനെ പുറത്തെടുക്കാനായത്. 

12 അടിയോളം നീളമുള്ള കൂറ്റൻ രാജവെമ്പാലയെ വിദഗ്ദ്ധ പരിശോധനകൾക്ക് ശേഷം വനത്തിനുള്ളിൽ കൊണ്ടുപോയി വിട്ടു. ന്യൂസ് ഏജൻസി എഎൻഐയാണ് ട്വിറ്ററിൽ വീഡിയോയും ചിത്രങ്ങളും പങ്കുവച്ചത്.