ചെന്നൈ: പ്രായപൂര്‍ത്തിയാകാത്ത പെണ്‍കുട്ടിയെ വിവാഹം ചെയ്ത പഞ്ചായത്ത് വൈസ് പ്രസിഡന്റിനെ അറസ്റ്റ് ചെയ്തു. തൂത്തുക്കുടിയിലാണ് സംഭവം. ആശീര്‍വാദപുരം സ്വദേശി സുന്ദര്‍രാജാണ് (38) പിടിയിലായത്.

പ്ലസ്ടുവിൽ പഠിക്കുന്ന 17കാരിയെയാണ് ഇയാള്‍ വിവാഹം ചെയ്തത്. ദരിദ്ര കുടുംബത്തില്‍ നിന്നുള്ള പെണ്‍കുട്ടിയെ സുന്ദര്‍രാജ് പെരികുളം ഗ്രാമത്തില്‍ വെച്ച് കഴിഞ്ഞ ദിവസമാണ് വിവാഹം ചെയ്തത്. 

വിവാഹത്തിനു ശേഷമാണ് ചൈല്‍ഡ്ലൈന്‍ അധികൃതര്‍ക്ക് ഇതേക്കുറിച്ച് വിവരം ലഭിച്ചത്. അവര്‍ ഉടന്‍ തന്നെ കല്യാണ വീട്ടിലെത്തി പെണ്‍കുട്ടിയെ രക്ഷിച്ചു. കുട്ടിയെ പിന്നീട് തൂത്തുക്കുടിയിലെ സംരക്ഷണ കേന്ദ്രത്തിലേക്ക് മാറ്റി. 

സംഭവത്തില്‍ സുന്ദര്‍രാജിനും മാതാപിതാക്കള്‍ക്കുമെതിരേ തിരുച്ചെന്തൂര്‍ വനിതാ പൊലീസ് ബാല വിവാഹ നിരോധന നിയമപ്രകാരം കേസെടുത്തു. അറസ്റ്റിലായ സുന്ദര്‍രാജിനെ ജുഡീഷ്യല്‍ കസ്റ്റഡിയില്‍ റിമാന്‍ഡ് ചെയ്തു.