വിജയവാഡ: 13കാരിയെ അര്‍ധ സഹോദരന്‍ 27,000 രൂപയ്ക്ക് വേശ്യവൃത്തി സംഘത്തിന് വിറ്റു. ജൂലായ് 18ന് ആന്ധ്രപ്രദേശിലെ പ്രകാശം ജില്ലയിലാണ് സംഭവം. സമയോചിതമായ പൊലീസിന്റെ ഇടപെടലാണ് പ്രായപൂര്‍ത്തിയാകാത്ത പെണ്‍കുട്ടിയ്ക്ക് രക്ഷയായത്. 

18ന് അവരുടെ വലയില്‍ കുടുങ്ങിയ പെണ്‍കുട്ടി ചൊവ്വാഴ്ച പൊലീസിന്റെ നൂറ് എന്ന നമ്പറില്‍ വിളിച്ചു. പെണ്‍കുട്ടിയുടെ കോള്‍ ട്രെയ്‌സ് ചെയ്ത് ലോക്കേഷന്‍ കണ്ടെത്തി. തുടര്‍ന്ന് രഹസ്യനീക്കങ്ങളിലൂടെ പെണ്‍കുട്ടിയെ രക്ഷപ്പെടുത്തുകയായിരുന്നു.  അച്ഛന്റെ രണ്ടാംവിവാഹത്തിലാണ്  പെണ്‍കുട്ടി പിറന്നത്. സ്വത്ത്തര്‍ക്കങ്ങള്‍ ഉള്‍പ്പെടെ നിരവധി വിഷയങ്ങള്‍ കാരണം വീട്ടില്‍ നിരന്തരം വഴക്കായിരുന്നു. ഇതേതുടര്‍ന്ന് പെണ്‍കുട്ടി അര്‍ധ സഹോദരനൊപ്പമായിരുന്നു താമസം. 

കഴിഞ്ഞ ദിവസം സഹോദരനും ഭാര്യയും ചേര്‍ന്ന് പ്രായപൂര്‍ത്തിയാകാത്ത പെണ്‍കുട്ടിയെ വേശ്യവൃത്തി സംഘത്തിന് 27,000 രൂപയ്ക്ക് വില്‍ക്കുകയായിരുന്നു. സംഭവത്തില്‍ പൊലീസ് കേസ്് രജിസ്റ്റര്‍ ചെയ്തു. പെണ്‍വാണിഭസംഘത്തിന് നേരെ പോക്‌സോ വകുപ്പുകള്‍ ഉള്‍പ്പടെ ചേര്‍ത്താണ് കേസ് എടുത്തിരിക്കുന്നത്. അതേസമയം അര്‍ധസഹോദരനും ഭാര്യയ്ക്കുമെതിരെ കേസ് എടുത്തിട്ടില്ല.