ഹൈദരാബാദ്: തെലങ്കാനയില്‍ കോവിഡ് സ്ഥിരീകരിച്ച 82കാരിയെ പാടത്ത് ഉപേക്ഷിച്ച് മക്കള്‍. രോഗം പകരുമെന്ന ഭയത്താല്‍ പാടത്തെ താല്‍ക്കാലിക ഷെഡില്‍ ഉപേക്ഷിച്ച് ആണ്‍ മക്കള്‍ കടന്നുകളയുകയായിരുന്നു.

തെലങ്കാനയിലെ വാറങ്കലിലാണ് സംഭവം. ഒരു മകള്‍ ഉള്‍പ്പെടെ അഞ്ചുപേരുടെ അമ്മയായ ലച്ചമ്മയെ കൃഷിയിടത്തിലെ കിണറിന് സമീപമാണ് ഉപേക്ഷിച്ചത്. പരസഹായമില്ലാതെ നടക്കാന്‍ പോലും കഴിയാത്ത അവസ്ഥയിലാണ് 82കാരി. 

ദിവസങ്ങള്‍ക്ക് മുന്‍പ് രോഗലക്ഷണങ്ങള്‍ പ്രകടിപ്പിച്ച 82കാരിക്ക് പിന്നീട് രോഗം സ്ഥിരീകരിക്കുകയായിരുന്നു. രോഗം പകരുമെന്ന ഭയത്താല്‍ നാലു ആണ്‍മക്കള്‍ ചേര്‍ന്ന് കൃഷിയിടത്തിലെ കിണറിന് സമീപം ഉപേക്ഷിച്ച് കടന്നുകളയുകയായിരുന്നുവെന്നാണ് റിപ്പോര്‍ട്ടുകള്‍. അമ്മയുടെ ദുരവസ്ഥ അറിഞ്ഞ മകളാണ് അമ്മയുടെ വിവരം പുറംലോകത്ത് എത്തിച്ചത്.