വൈദ്യുതാഘാതമേറ്റവര്‍ക്ക് ഉടന്‍ തന്നെ അടിയന്തര ശ്രൂശ്രൂഷ നല്‍കിയാല്‍ ജീവിതത്തിലേക്ക് തിരികെ കൊണ്ടുവരാന്‍ സാധിക്കുമെന്നാണ് വൈദ്യശാസ്ത്രം പറയുന്നത്. ഇപ്പോള്‍ വൈദ്യുതാഘാതമേറ്റ കുരങ്ങനെ മറ്റൊരു കുരങ്ങ് രക്ഷിക്കുന്ന ദൃശ്യങ്ങളാണ് വൈറലാകുന്നത്.

സുശാന്ത നന്ദ ഐഎഫ് എസാണ് വീഡിയോ പങ്കുവെച്ചത്. റെയില്‍വേ സ്റ്റേഷനാണ് പശ്ചാത്തലം. ഇവിടെ കുരങ്ങന്മാര്‍ ഓടി നടക്കുന്നത് കാണാം. അതിനിടെയാണ് ഒരു കുരങ്ങന് വൈദ്യുതാഘാതമേറ്റത്.

ഉടന്‍ തന്നെ തൊട്ടരികിലുള്ള മറ്റൊരു കുരങ്ങന്‍ അടിയന്തര ശ്രൂശ്രൂഷ നല്‍കുന്നതാണ് വീഡിയോയുടെ ഉള്ളടക്കം. കഴുത്തില്‍ കടിച്ചുപിടിച്ച് തുടര്‍ച്ചയായി വലിച്ചും വെള്ളത്തില്‍ മുക്കിയും മറ്റും കുരങ്ങനെ രക്ഷിക്കുന്ന ദൃശ്യങ്ങളാണ് അമ്പരിപ്പിക്കുന്നത്. 

മനുഷ്യന്റെ പൂര്‍വികരാണ് കുരങ്ങന്മാര്‍ എന്നാണ് പൊതുവേ പറയാറ്. ഇത് ശരിയാണ് എന്ന് ഒരിക്കല്‍ കൂടി വ്യക്തമാക്കുന്നതാണ് വീഡിയോ. മനുഷ്യന്മാര്‍ ചെയ്യുന്നതിന് സമാനമായാണ് കുരങ്ങന്‍ അടിയന്തര ശ്രൂശ്രൂഷ നല്‍കുന്നതെന്ന് സുശാന്ത നന്ദ ട്വിറ്ററില്‍ കുറിച്ചു.