ഭോപ്പാല്‍: വിവാഹത്തിന് ക്ഷണിക്കാത്തതിന് സുഹൃത്ത് മര്‍ദ്ദിച്ചതായി നവവരന്‍ പൊലീസില്‍ പരാതി നല്‍കി. മധ്യപ്രദേശിലെ ഭിന്ദ് ജില്ലയിലാണ് സംഭവം. 

ദേഹത് പൊലീസ് സ്റ്റേഷന്‍ പരിധിയിലെ ചന്ദ്പുര ഗ്രാമത്തില്‍ ഞായറാഴ്ച രാത്രിയാണ് കേസിനാധാരമായ സംഭവം. പ്രതി നരേന്ദ്ര കുശ് വാഹയ്‌ക്കെതിരെ എഫഐആര്‍ രജിസ്റ്റര്‍ ചെയ്തതായി പൊലീസ് പറഞ്ഞു.

വിവാഹത്തിന് ക്ഷണിച്ചില്ലെന്ന് പറഞ്ഞാണ് കുശ്വന്ത് മര്‍ദ്ദിച്ചതെന്ന് 22 കാരന്‍ പൊലീസില്‍ നല്‍കിയ പരാതിയില്‍ പറയുന്നു. കോവിഡ് പ്രോട്ടോകോള്‍ നിലനില്‍ക്കുന്നതിനാല്‍ അടുത്ത ബന്ധുക്കളെ മാത്രമായിരുന്നു കല്യാണത്തിന് ക്ഷണിച്ചത്. അതുകൊണ്ടാണ് വിളിക്കാതിരുന്നെതെന്നും ഇയാള്‍ പറഞ്ഞെങ്കിലും കുപിതനായ സുഹൃത്ത് ഇത് കേള്‍ക്കാതെ മര്‍ദ്ദിക്കുകയായിരുന്നു. 

വിവാഹത്തിന് ക്ഷണിച്ചില്ലെങ്കിലും മദ്യം വാങ്ങാന്‍ 500 രുപ നല്‍കണമെന്ന് ആവശ്യപ്പെട്ടു. നൂറ് രൂപ നല്‍കിയെങ്കിലും ഇയാള്‍ കൂടുതല്‍ തുക ആവശ്യപ്പെട്ട് വീണ്ടും മര്‍ദ്ദിക്കുകയായിരുന്നു. ഇയാള്‍ക്ക് കണ്ണിനും ശരീരത്തിലും പരിക്കേറ്റിട്ടുണ്ട്. സംഭവത്തിന് പിന്നാലെ പ്രതി ഓടിരക്ഷപ്പെട്ടു.