കൊല്‍ക്കത്ത: ബംഗാളി സൂപ്പര്‍താരം മിഥുന്‍ ചക്രവര്‍ത്തി ബിജെപിയില്‍ ചേര്‍ന്നു. പ്രധാനമന്ത്രി നരേന്ദ്രമോദിയുടെ റാലിയില്‍ വച്ചാണ് അദ്ദേഹം പാര്‍ട്ടി
അംഗത്വം സ്വീകരിച്ചത്. ബിജെപി ബംഗാള്‍ ഘടകം അധ്യക്ഷന്‍ ദിലീപ് ഘോഷ്, നന്ദിഗ്രാം സ്ഥാനാര്‍ഥി സുവേന്ദു അധികാരി, തുടങ്ങിയവരുടെ സാന്നിധ്യത്തില്‍ വച്ചായിരുന്നു അംഗത്വമെടുത്തത്.

കഴിഞ്ഞ ദിവസം ബിജെപി ദേശീയ ജനറല്‍ സെക്രട്ടറി കൈലാശ് വിജയ് വാര്‍ഗിയ മിഥുനുമായി കൊല്‍ക്കത്തയിലെ വീട്ടില്‍ കൂടികാഴ്ച നടത്തിയിരുന്നു.ഞായറാഴ്ച കൊല്‍ക്കത്ത ബ്രിഗേഡ് മൈതാനത്ത് നടക്കുന്ന പ്രധാനമന്ത്രിയുടെ ബിജെപി മഹാറാലിയില്‍ പങ്കെടുക്കാനായി നേരത്തെ തന്നെ വേദിയിലെത്തിയിരുന്നു. മിഥുനുമായി കൂടിക്കാഴ്ച നടത്തിയ കാര്യം കൈലാഷ് വിജയ് വാര്‍ഗിയ ട്വിറ്ററില്‍ കുറിച്ചിരുന്നു.

ഒരു കാലത്ത് ബംഗാള്‍ ഭരിച്ചിരുന്ന സിപിഐഎമ്മുമായി അടുത്ത വ്യക്തിയായിരുന്നു മിഥുന്‍ ചക്രവര്‍ത്തി. എന്നാല്‍ പിന്നീട് തൃണമൂല്‍ സഹയാത്രികനായി. ഇദ്ദേഹത്തിന് രാജ്യസഭ സീറ്റും തൃണമൂല്‍ നല്‍കിയിരുന്നു എന്നാല്‍ പിന്നീട് ഈ സ്ഥാനം രാജിവച്ച് താന്‍ രാഷ്ട്രീയം വിടുകയാണെന്ന് ഇദ്ദേഹം പ്രസ്താവിച്ചിരുന്നു.