മുംബൈ: അണ്ണാ ഹസാരെ വീണ്ടും നിരാഹാര സമരത്തിന് ഒരുങ്ങുന്നു. ഇത്തവണ മഹാരാഷ്ട്രയിലെ ഉദ്ധവ് താക്കറെ സർക്കാരിന്റെ നയത്തിനെതിരെയാണ് അദ്ദേഹത്തിന്റെ സമരം. സൂപ്പർ മാർക്കറ്റ് വഴി വൈൻ വിൽക്കാൻ അനുമതി നൽകാനുള്ള മഹാരാഷ്ട്ര സർക്കാരിന്റെ നീക്കമാണ് അണ്ണാ ഹസാരെയെ ചൊടിപ്പിച്ചത്. 

തീരുമാനത്തിനെതിരെ അനിശ്ചിതകാല നിരാഹാര സമരം നടത്തുമെന്ന് മുന്നറിയിപ്പ് നൽകി ഹസാരെ മുഖ്യമന്ത്രിക്ക് കത്തയച്ചു. മുൻപ് കത്തെഴുതിയിട്ടും സർക്കാർ പ്രതികരിച്ചില്ലെന്നും അദ്ദേഹം പറയുന്നു. ബിജെപിയും ഈ തീരുമാനത്തിനെതിരെ രംഗത്തുണ്ട്.

സൂപ്പർ മാർക്കറ്റുകളിലും പലചരക്ക് കടകളിലും വൈൻ വിൽക്കാൻ അനുമതി നൽകാനുള്ള ഒരുക്കത്തിലാണ് സർക്കാർ. എന്നാൽ, ഈ തീരുമാനം വരും തലമുറയെ ബാധിക്കുമെന്നാണ് ഹസാരെയുടെ പക്ഷം. തീരുമാനം പിൻവലിച്ചില്ലെങ്കിൽ നിരാഹാര സമരം ഇരിക്കുമെന്നാണ് താക്കറെയ്ക്ക് അയച്ച കത്തിൽ അദ്ദേഹത്തിന്റെ മുന്നറിയിപ്പ്.