ന്യൂഡല്‍ഹി: ഉത്തര്‍പ്രദേശ് തെരഞ്ഞെടുപ്പിലെ താരപ്രചാരകരുടെ പട്ടിക പുറത്തുവിട്ട് ബിജെപി. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ബിജെപി അധ്യക്ഷന്‍ നഡ്ഡ, യുപി മുഖ്യമന്ത്രി യോഗി ആദിത്യനാഥ്,  രാജ്നാഥ് സിങ്, സ്മൃതി ഇറാനി എന്നിവരടക്കം 30പേരാണ് പട്ടികയിലുള്ളത്. അതേസമയം, ബിജെപിക്ക് എതിരെ വിമത സ്വരമുയര്‍ത്തിയ വരുണ്‍ ഗാന്ധിയും അമ്മ മേനക ഗാന്ധിയും പട്ടികയിലില്ല. 

2017ലെ തെരഞ്ഞെടുപ്പില്‍ ബിജെപിയുടെ പ്രധാന പ്രചാരകരായിരുന്നു രണ്ടുപേരും. ദേശീയ പ്രവര്‍ത്തക സമിതിയില്‍നിന്നും വരുണിനെയും മേനകയെയും ബിജെപി പുറത്താക്കിയിരുന്നു. പിന്നാലെ കര്‍ഷക സമരത്തെ തുണച്ചും സര്‍ക്കാരിനെ വിമര്‍ശിച്ചും വരുണ്‍ രംഗത്തെത്തിയിരുന്നു.  കര്‍ഷക സമരത്തിലും ലഖിംപുര്‍ ഖേരി കൂട്ടക്കൊലയിലും വരുണ്‍ ഗാന്ധി രൂക്ഷ പ്രതികരണങ്ങളാണ് നടത്തിയത്. 

കോവിഡ് പ്രോട്ടോക്കോള്‍ പാലിക്കണമെന്ന നിര്‍ദേശത്തെ തുടര്‍ന്ന് വിര്‍ച്വല്‍ റാലികളും മറ്റുമാണ് ബിജെപി നിലവില്‍ ശ്രദ്ധിക്കുന്നത്. ജനുവരി അവസാന വാരത്തോടെ, മോദിയും അമിത് ഷായും ഉള്‍പ്പെടെയുള്ള നേതാക്കള്‍ യുപിയില്‍ ക്യാമ്പ് ചെയ്ത് പ്രചരണത്തിന് നേതൃത്വം നല്‍കുമെന്നാണ് റിപ്പോര്‍ട്ട്.