ചെന്നൈ : തമിഴ്‌നാട്ടില്‍ കോണ്‍ഗ്രസില്‍ ഭിന്നത രൂക്ഷമാകുന്നു. ശിവഗംഗയില്‍ ജില്ലാ കോണ്‍ഗ്രസ് നേതൃയോഗത്തില്‍ പ്രവര്‍ത്തകര്‍ ഇരു വിഭാഗമായി തിരിഞ്ഞ് കൂട്ടയടി. കസേരകള്‍ വലിച്ചെറിഞ്ഞ് പ്രവര്‍ത്തകര്‍ അക്രമാസക്തരായി. 

ശിവഗംഗ എംപി കാര്‍ത്തി ചിദംബരത്തിന്റെ സാന്നിധ്യത്തിലാണ് പ്രവര്‍ത്തകര്‍ ചേരി തിരിഞ്ഞ് ഏറ്റുമുട്ടിയത്. സംഘര്‍ഷത്തിന്റെ വീഡിയോ പുറത്തായി. 

നേതാക്കളുടെ തലയ്ക്ക് മുകളിലൂടെ കസേരകള്‍ പറക്കുന്നത് വീഡിയോയില്‍ കാണാം. കസേരകള്‍ വരുന്നത് കണ്ട് ഓടി മാറുന്ന പ്രവര്‍ത്തകരെയും വീഡിയോയില്‍ കാണാം. 

കസേര എടുത്ത് യോഗം നടന്ന ഹാളിന് പുറത്തേക്കും പ്രവര്‍ത്തകര്‍ വലിച്ചെറിയുന്നുണ്ട്. പൊലീസ് എത്തി പ്രവര്‍ത്തകരെയെല്ലാം പിരിച്ചു വിടുകയായിരുന്നു. 

അടുത്ത് നടക്കാനിരിക്കുന്ന തദ്ദേശ തെരഞ്ഞെടുപ്പുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യാനാണ് കോണ്‍ഗ്രസ് ജില്ലാ കമ്മിറ്റി യോഗം വിളിച്ചത്.