ചെന്നൈ : പ്രായപൂർത്തിയാകാത്ത പെൺകുട്ടികളെ ലൈംഗികമായി പീഡിപ്പിച്ച കേസിൽ പാസ്റ്റർക്ക് വധശിക്ഷ. തിരുനെൽവേലി സ്വദേശിയായ എബ്രഹാം എന്ന പാസ്റ്ററെയാണ് ശിക്ഷിച്ചത്. 47കാരനായ പാസ്റ്റർക്ക് 52,000 രൂപ പിഴയും തിരുനെൽവേലി പോക്സോ സ്പെഷൽ കോടതി ചുമത്തിയിട്ടുണ്ട്.

കേസ് അപൂർവങ്ങളിൽ അപൂർവം എന്ന വിഭാ​ഗത്തിൽപ്പെടുന്നതാണെന്ന് കോടതി നിരീക്ഷിച്ചു. മാർ​​​ഗദർശനം നൽകേണ്ടയാൾ തന്നെയാണ് കുട്ടികളെ ക്രൂരമായി പീഡിപ്പിച്ചതെന്ന് കോടതി അഭിപ്രായപ്പെട്ടു. പ്രതി ചെയ്ത ​കുറ്റം അതീവ ​ഗൗരവമേറിയതാണെന്നും കോടതി നിരീക്ഷിച്ചു. ഇരകളായ നാല് പെൺകുട്ടികൾക്കും 10 ലക്ഷം രൂപ വീതം നഷ്ടപരിഹാരം നൽകാനും സംസ്ഥാന സർക്കാരിനോട് കോടതി നിർദ്ദേശിച്ചു.

2022ലാണ് കേസിനാസ്പദമായ സംഭവം നടന്നത്. തിരുനെൽവേലി ജില്ലയിലെ തേവർകുളത്തിനടുത്തുള്ള മേല ഇളന്തൈകുളത്ത് പ്രാർത്ഥനാ ഹാൾ നടത്തിവരികയായിരുന്നു ഇയാൾ. അവധിക്കാലത്ത് സദാചാര ക്ലാസുകൾ എടുക്കുന്നതിന്റെ മറവിലാണ് പ്രായപൂർത്തിയാകാത്ത കുട്ടികളെ ഇയാൾ ലൈംഗികമായി പീഡിപ്പിച്ചത്.