മുംബൈ: മഹാരാഷ്ട്ര സെക്രട്ടേറിയറ്റില്‍ മദ്യക്കുപ്പികളുടെ കൂമ്പാരം കണ്ടെത്തി. മുഖ്യമന്ത്രിയുടെയും മറ്റു മന്ത്രിമാരുടെയും ഓഫിസുകള്‍ സ്ഥിതിചെയ്യുന്ന താഴത്തെ നിലയില്‍ തന്നെയാണ് മദ്യക്കുപ്പികള്‍ കണ്ടെത്തിയത്. സര്‍ക്കാര്‍ അന്വേഷണത്തിന് ഉത്തരവിട്ടു.

മന്ത്രാലയയിലെ താഴത്തെ നിലയില്‍ കന്റിനു സമീപമായി കോണിച്ചുവട്ടിലാണ് മദ്യക്കുപ്പികള്‍ കൂട്ടിയിട്ടിരിക്കുന്നതായി കണ്ടെത്തിയത്. മന്ത്രാലയില്‍ കരാര്‍ ജോലികള്‍ ചെയ്യുന്ന പണിക്കാരാവാം മദ്യംകൊണ്ടുവന്നത് എന്നാണ് പൊതു ഭരണ വകുപ്പു കൈകാര്യം ചെയ്യുന്ന മന്ത്രി ദത്താത്രേയ ഭരാനേ പറയുന്നത്. ഇതു തന്റെ വ്യക്തിപരമായ അഭിപ്രായമാണെന്നും അന്വേഷണം നടത്തിയാലേ വിവരങ്ങള്‍ പുറത്തുവരൂ എന്നും അദ്ദേഹം പറഞ്ഞു.

ഭരണസിരാകേന്ദ്രത്തില്‍ തന്നെ മദ്യക്കുപ്പികളുടെ കൂമ്പാരം കണ്ടെത്തിയത് സര്‍ക്കാരിനെ പ്രതിരോധത്തിലാക്കി. സംഭവത്തില്‍ വിശദമായ അന്വേഷണം നടത്തുമെന്നും കുറ്റക്കാരെ കണ്ടെത്തുമെന്നും ഭരാനേ പറഞ്ഞു. 

സുരക്ഷാ പാസ് ഇല്ലാതെ ആര്‍ക്കും മന്ത്രാലയയില്‍ പ്രവേശിക്കാനാവില്ല. അതുകൊണ്ടുതന്നെ ഇക്കാര്യത്തില്‍ സുരക്ഷാ വീഴ്ചയുണ്ടായോ എന്നു പരിശോധിക്കുമെന്ന് മന്ത്രി പറഞ്ഞു.

എന്നാല്‍ സര്‍ക്കാരിനെതിരെ വിമര്‍ശനവുമായി പ്രതിപക്ഷമായ ബിജെപി രംഗത്തുവന്നു.