ന്യൂഡല്‍ഹി: ഇന്ധനവില വര്‍ധനവിന് എതിരെ രാജ്യത്ത് വലിയ പ്രതിഷേധമാണ് ഉയരുന്നത്. പെട്രോള്‍ പമ്പില്‍ ക്രിക്കറ്റ് കളിച്ചും പ്രധാനമന്ത്രി നരേന്ദ്ര മോദിയുടെ കോലം കത്തിച്ചുമൊക്കെ പ്രതിഷേധം നടക്കുന്നു. സാമൂഹ്യ മാധ്യമങ്ങളിലും വില വര്‍ധനവിന് എതിരെ പ്രതിഷേധം ശക്തമാണ്. വില വര്‍ധനവിനെ പരിഹസിച്ച് രംഗത്തെത്തിയ കോണ്‍ഗ്രസ് നേതാവ് കീര്‍ത്തി ആസാദിന്റെ ട്വീറ്റ് ചര്‍ച്ചയായിരിക്കുകയാണ്. 

'അവസാനം അത് സംഭവിച്ചിരിക്കുന്നു, പതിറ്റാണ്ടുകള്‍ക്ക് ശേഷം ഇപ്പോള്‍ ബിയറിന് പെട്രോളിനെക്കാള്‍ വിലക്കുറവാണ്. ഇപ്പോള്‍ പുതിയൊരു പരസ്യവാചകവുമുണ്ടാകും, കുടിക്കൂ, വാഹനം ഓടിക്കരുത്'' - കീര്‍ത്തി ആസാദ് ട്വിറ്ററില്‍ കുറിച്ചു.

രണ്ടു ദിവസം മുമ്പുള്ള ട്വീറ്റ് ഇതിനോടകം നാലായിരത്തിലേറെ പേരാണ് റീട്വീറ്റ് ചെയ്തിരിക്കുന്നത്. ഇരുപതിനായിരത്തിലേറെ ലൈക്കുകളും ലഭിച്ചിട്ടുണ്ട്. കേരളത്തിലടക്കം പലയിടത്തും അടുത്തിടെ പ്രീമിയം പെട്രോളിന് വില നൂറു കടന്നിരുന്നു. എന്നാല്‍ ഇന്ധനവില വര്‍ധനവിനെ ന്യായീകരിക്കുകയാണ് കേന്ദ്രസര്‍ക്കാര്‍ ചെയ്യുന്നത്. ഇന്ധനവില വര്‍ധിപ്പിക്കുന്നത് ക്ഷേമ പ്രവര്‍ത്തനങ്ങള്‍ക്ക് പണം കണ്ടെത്താന്‍ വേണ്ടിയാണ് എന്നാണ് കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാന്റെ ന്യായീകരണം.