പ്രതാപ്ഗഡ് ( ഉത്തർപ്രദേശ്):  ഉത്തർപ്രദേശിലെ പ്രതാപ്ഗഡിൽ ഉണ്ടായ വാഹനാപകടത്തിൽ ആറ് കുട്ടികൾ ഉൾപ്പെടെ 14 പേർ മരിച്ചു.  യാത്രക്കാർ സഞ്ചരിച്ചിരുന്ന എസ്‌യുവി കാർ ട്രക്കുമായി കൂട്ടിയിടിച്ചാണ് അപകടം ഉണ്ടായത്. പ്രയാഗ്‌രാജ്- ലഖ്‌നൗ ഹൈവേയിൽ ഇന്നലെ രാത്രിയാണ് അപകടമുണ്ടായത്. 

ടയർ പഞ്ചറായതിനെത്തുടർന്ന് ഹൈവേയുടെ അരികിൽ നിർത്തിയിട്ടിരുന്ന ട്രക്കിലേക്ക് കാർ വന്നിടിക്കുകയായിരുന്നു. മുൻഭാഗം പൂർണ്ണമായും നശിച്ച നിലയിൽ മഹീന്ദ്ര ബൊലേറോ കാർ അപകടദൃശ്യങ്ങളിൽ കാണാം. കാറിലുണ്ടായിരുന്നവർ വിവാഹത്തിൽ പങ്കെടുത്ത ശേഷം ഗോണ്ടയിലെ ഗ്രാമത്തിലേക്ക് മടങ്ങവെയാണ് അപകടം സംഭവിച്ചതെന്ന് പൊലീസ് പറഞ്ഞു.