എട്ട് വർഷത്തെ പ്രണയത്തിനൊടുവിൽ ഹൈദരാബാദിൽ ഗേ ദമ്പതികൾ വിവാഹിതരായി. സുപ്രിയോ ചക്രബർത്തിയും (31) അഭയ് ഡാങും (34) ആണ് വിവാഹിതരായത്. ബന്ധുക്കളുടെയും അടുത്ത സുഹൃത്തുക്കളുടെയും സാന്നിധ്യത്തിലായിരുന്നു ചടങ്ങുകൾ. 

ശനിയാഴ്ച സ്വകാര്യ ചടങ്ങിനിടെയാണ് ഇരുവരും മോതിരം കൈമാറി താലിചാർത്തി വിവാഹിതരായത്. കോൽക്കത്ത സ്വദേശിയാണ് പ്രമുഖ ഹോട്ടൽ മാനേജ്‌മെന്റ് ഇൻസ്റ്റിറ്റിയൂട്ടിലെ അധ്യാപകനായ സുപ്രിയോ. ബഹുരാഷ്ട്ര കമ്പനിയിലെ ജീവനക്കാരനായ അഭയ് ഡൽഹി സ്വദേശിയാണ്. ബംഗാളി രീതിയിലും പഞ്ചാബി ആചാരപ്രകാരവുമാണ് വിവാഹചടങ്ങുകൾ നടന്നത്.