ന്യൂഡൽഹി: ​ഗോവ-മം​ഗളൂരു വന്ദേഭാരത് എക്സ്പ്രസ് ബെം​ഗളൂരുവിലേക്ക് നീട്ടി. പുതിയ വന്ദേഭാരത് എക്സ്പ്രസിന്റെ സർവീസ് ഫ്ലാ​ഗ് ഓഫ് വെള്ളിയാഴ്ച നടക്കും. നവംബർ 13-ന് പ്രധാനമന്ത്രി നരേന്ദ്രമോദി ​ഗോവ-ബെം​ഗളൂരൂ വന്ദേഭാരത് രാജ്യത്തിന് സമർപ്പിക്കും.

12 സ്റ്റോപ്പുകളാണ് ട്രെയിന് ഉണ്ടാകുക. 13 മണിക്കൂർ 20 മിനിറ്റ് കൊണ്ടാകും സർവീസ് പൂർത്തിയാക്കുക. ഇരു ദിശകളിലേക്കും ആഴ്ചയിൽ ആറുദിവസം ട്രെയിൻ സർവീസ് നടത്തും. ബെം​ഗളൂരുവിൽനിന്ന് ബുധനാഴ്ചയും ​ഗോവയിൽനിന്ന് വ്യാഴാഴ്ചയും സർവീസ് ഉണ്ടായിരിക്കുന്നതല്ല.

മണിക്കൂറിൽ 54 കിലോമീറ്ററാണ് ട്രെയിനിന്റെ വേഗത. രാജ്യത്തെ വേ​ഗം കുറഞ്ഞ വന്ദേഭാരത് സർവീസാകും ഇത്. ​ഗോവ-മം​ഗളൂരൂ വന്ദേഭാരത് കോഴിക്കോട്ടേക്ക് നീട്ടണമെന്ന് ആവശ്യമുയർന്നിരുന്നു. എന്നാൽ, ഇത് റെയിൽവേ പരി​ഗണിച്ചില്ല.

ട്രെയിനിന്റെ സ്റ്റോപ്പുകൾ അറിയാം

രാവിലെ 7.35-ന് യശ്വന്ത്പൂരിൽ നിന്ന് പുറപ്പെടുന്ന ട്രെയിൻ രാത്രി 8.55-ന് ​ഗോവയിലെത്തും. ​ഗോവയിൽനിന്ന് രാവിലെ 8.20ന് പുറപ്പെട്ട് രാത്രി 9.15ന് യശ്വന്ത്പൂരിൽ തിരിച്ചെത്തും.

ശ്രാവണബെലഗോള, ഹാസൻ സക്ലേഷ് പുര, സുബ്രഹ്മണ്യ റോഡ്, കബക്കാപുത്തൂർ, മംഗളൂരു ജംഗ്ഷൻ, തൊക്കൂർ, ഉഡുപ്പി കുന്താപ്പുര, മൂകാംബിക റോഡ് ബൈന്ദൂർ, മുരുഡേശ്വർ ഗോകർണ റോഡ്, കാർവാർ എന്നിവിടങ്ങളിൽ സ്റ്റോപ്പുകളുണ്ട്.