പറ്റ്‌ന: മുറുക്കിത്തുപ്പിയത് ദേഹത്തു തെറിച്ചതിന്റെ പേരിലുള്ള തര്‍ക്കത്തെത്തുടര്‍ന്ന് ഒരാളെ വെടിവച്ചുകൊന്നു. ബിഹാറിലെ സിവാന്‍ ജില്ലയിലാണ് സംഭവം.

ഞായറാഴ്ചയാണ് സംഭവമുണ്ടായതെന്ന് പൊലീസ് പറഞ്ഞു. നവാബ് ഹസന്‍ എന്നയാളാണ് വെടിയേറ്റു മരിച്ചത്. തെരുവില്‍ കച്ചവടം നടത്തി ജീവിക്കുന്നയാളാണ് ഹസന്‍.

രാവിലെ വീട്ടില്‍ ഭക്ഷമുണ്ടാക്കിക്കൊണ്ടിരിക്കുകയായിരുന്നു ഹസന്‍. ഇതിനൊപ്പം ഇയാള്‍ മുറുക്കാന്‍ ചവച്ചിരുന്നു. മുറിയുടെ വാതിലിലൂടെ ഹസന്‍ മുറുക്കാന്‍ തുപ്പിയത് പുറത്തുനില്‍ക്കുകയായിരുന്നയാളുടെ ദേഹത്തു തെറിച്ചു. ഇയാള്‍ മുറിക്കുള്ളിലേക്കു കയറിവന്ന് ഹസനെ ചോദ്യം ചെയ്തു.

ഇരുവരും തമ്മിലുള്ള സംസാരം തര്‍ക്കമായി മാറി. തുടര്‍ന്ന് ഇയാള്‍ തോക്കെടുത്ത് ഹസനെ വെടിവയ്ക്കുകയായിരുന്നു. ആശുപത്രിയില്‍ എത്തിക്കും മുമ്പു തന്നെ ഹസന്‍ മരിച്ചതായി പൊലീസ് പറഞ്ഞു. വെടിവച്ചയാള്‍ക്കായി അന്വേഷണം നടക്കുകയാണെന്ന് പൊലീസ് അറിയിച്ചു.