കൊല്‍ക്കത്ത: മുംബൈയിലേക്ക് യാത്ര പുറപ്പെടാനിരിക്കേ, ഇന്‍ഡിഗോയുടെ വിമാനത്തില്‍ പാമ്പിനെ കണ്ടെത്തി. കൊല്‍ക്കത്ത വിമാനത്താവളത്തിലാണ് സംഭവം.

മുംബൈയിലേക്ക് യാത്ര പുറപ്പെടുന്നതിന് തൊട്ടുമുന്‍പ് ബാഗേജ് ബെല്‍റ്റിലാണ് പാമ്പിനെ കണ്ടെത്തിയത്. റായ്പൂരില്‍ നിന്ന് പറന്നെത്തിയ വിമാനം മുംബൈയിലേക്ക് പുറപ്പെടുന്നതിന് മുന്‍പ് റിമോട്ട് ബേയില്‍ പാര്‍ക്ക് ചെയ്യാന്‍ മാറ്റിയിട്ടു. അവിടെ വച്ച് ഗ്രൗണ്ട് സ്റ്റാഫാണ് പാമ്പിനെ കണ്ടെത്തിയത്. ഉടന്‍ തന്നെ വിമാനത്താവള അധികൃതരെ വിവരം അറിയിച്ചു. വനംവകുപ്പ് ഉദ്യോഗസ്ഥരെത്തിയ പാമ്പിനെ പിടികൂടി.

ലഗേജ് പുറത്തേയ്ക്ക് എടുക്കുന്നതിനിടെയാണ് പാമ്പ് വിമാനത്തിന് അകത്തേയ്ക്ക് പ്രവേശിച്ചതെന്നാണ് നിഗമനം. പാമ്പ് ചേരയാണെന്ന് തിരിച്ചറിഞ്ഞു.