ഇറ്റാനഗര്‍: അരുണാചല്‍ പ്രദേശില്‍ നിതീഷ്‌കുമാറിന്റെ ജനതാദള്‍ യുണൈറ്റഡിന് തിരിച്ചടി. ജനതാദള്‍ യുണൈറ്റഡിന്റെ ആറ് എംഎല്‍എമാര്‍ ബിജെപിയിലേക്ക് കൂറുമാറി. ഇതോടെ 60 അംഗ അരുണാചല്‍ പ്രദേശ് നിയമസഭയില്‍ ജെഡിയുവിന്റെ അംഗബലം ഒന്നായി ചുരുങ്ങി. പീപ്പിള്‍സ് പാര്‍ട്ടിയുടെ എംഎല്‍എ കൂടി പാര്‍ട്ടിയില്‍ ചേര്‍ന്നതോടെ ബിജെപിയുടെ അംഗബലം 48 ആയി ഉയര്‍ന്നു.

ബിഹാര്‍ തെരഞ്ഞെടുപ്പില്‍ ഏറ്റവും വലിയ ഒറ്റകക്ഷി ബിജെപിയാണ്. നിതീഷ് കുമാറാണ് മുഖ്യമന്ത്രിയെങ്കിലും തെരഞ്ഞെടുപ്പില്‍ ജെഡിയുവിന് ക്ഷീണമുണ്ടായി. 2015ല്‍ 71 എംഎല്‍എമാര്‍ ഉണ്ടായിരുന്ന സ്ഥാനത്ത് 43 ആയാണ് ചുരുങ്ങിയത്.എന്‍ഡിഎ മുന്നണിയില്‍ രണ്ടാമത്തെ ഏറ്റവും വലിയ ഘടക കക്ഷിയായാണ് ജെഡിയു മാറിയത്. ഇതിന് പിന്നാലെയാണ് അരുണാചല്‍ പ്രദേശില്‍ ജെഡിയുവിന് തിരിച്ചടി ഉണ്ടായത്.

പ്രധാനമന്ത്രി നരേന്ദ്രമോദിയുടെ നേതൃത്വത്തോടുള്ള ജനങ്ങളുടെ വിശ്വാസമാണ് ഇത് കാണിക്കുന്നതെന്ന് ബിജെപി സംസ്ഥാന അധ്യക്ഷന്‍ വ്യക്തമാക്കി. കൂടാതെ പേമ ഖണ്ഡു സര്‍ക്കാരിനുള്ള ജനങ്ങളുടെ മികച്ച പിന്തുണയും ഇതിന് തെളിവാണെന്നും അദ്ദേഹം വ്യക്തമാക്കി.