പട്ന: പ്രതിപക്ഷ ഐക്യ സമ്മേളനത്തിനു പിന്നാലെ കോൺ​ഗ്രസ് നേതാവ് രാഹുൽ ​ഗാന്ധിക്ക് മുതിർന്ന നേതാവായ ആർജെഡിയുടെ ലാലു പ്രസാദ് യാദവിന്റെ വക ഉപദേശം. മറ്റൊന്നുമായിരുന്നില്ല ലാലുവിന്റെ ആവശ്യം. രാഹുൽ ​ഗാന്ധി കല്യാണം കഴിക്കണമെന്നായിരുന്നു ലാലു ആവശ്യപ്പെട്ടത്. യോ​ഗ ശേഷം മാധ്യമങ്ങളെ കാണുന്നതിനിടെയായിരുന്നു ലാലു ഇക്കാര്യം പറഞ്ഞത്. കേട്ടു നിന്നവരിൽ ചിരി പടർത്തുന്നതായിരുന്നു ലാലുവിന്റെ പ്രതികരണം.

’രാഹുൽ താങ്കൾ ഒരു വിവാഹം കഴിക്കണം. സമയം ഇനിയും വൈകിയിട്ടില്ല. താടിയൊക്കെ വടിച്ചു കളയണം. വിവാഹത്തെക്കുറിച്ചു പറയുമ്പോൾ താങ്കൾ കേൾക്കുന്നില്ലെന്ന് അമ്മ ഞങ്ങളോടു പരാതി പറയുന്നു. താങ്കളുടെ വിവാ​ഹ ഘോഷയാത്രയിൽ പങ്കെടുക്കാൻ ഞങ്ങൾക്കൊക്കെ ആ​ഗ്രഹമുണ്ട്. അതിനായി കാത്തിരിക്കുകയാണ്. കല്യാണം കഴിക്കാൻ ആഗ്രഹിക്കുന്നുണ്ടോ, ഇനിയും സമയമുണ്ട്. അതിപ്പോൾ ഉറപ്പിക്കൂ. ഞങ്ങൾ പറയുന്നത് കേൾക്കൂ’- ലാലു ഉപദേശിച്ചു. 

രാഹുലിന്റെ പ്രവർത്തനങ്ങളെ പ്രശംസിച്ചതിനു പിന്നാലെയായിരുന്നു ചിരി പടർത്തിയ ലാലുവിന്റെ പ്രതികരണം. വിവാഹക്കാര്യം ചിരിയിൽ ഒതുക്കിയ രാഹുൽ പക്ഷേ താടി വെട്ടിയൊതുക്കാമെന്നു സമ്മതിച്ചു. താങ്കൾ പറഞ്ഞ സ്ഥിതിക്ക് വിവാഹം നടന്നേക്കാമെന്നും രാഹുൽ തമാശയായി പ്രതികരിച്ചു.

ഈ വാർത്ത കൂടി വായിക്കൂ 

മണിപ്പൂർ കലാപം; അമിത് ഷാ വിളിച്ചു ചേർത്ത സർവകക്ഷി യോ​ഗം ഇന്ന്  

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ