ചണ്ഡീഗഡ് : ശിരോമണി അകാലിദള്‍ പ്രസിഡന്റും പഞ്ചാബ് മുന്‍ ഉപമുഖ്യമന്ത്രിയുമായ സുഖ്ബീര്‍ സിങ് ബാദലിന് കോവിഡ് സ്ഥിരീകരിച്ചു. അദ്ദേഹം തന്നെയാണ് ഇക്കാര്യം അറിയിച്ചത്. ആരോഗ്യനില തൃപ്തികരമാണെന്നും, ഐസൊലേഷനിലാണെന്നും സുഖ്ബീര്‍ സിങ് ബാദല്‍ വ്യക്തമാക്കി. 

കഴിഞ്ഞ ഏതാനും ദിവസങ്ങളില്‍ താനുമായി സമ്പര്‍ക്കത്തിലേര്‍പ്പെട്ടവര്‍ കോവിഡ് പരിശോധനയ്ക്ക് വിധേയരാകണമെന്നും സുഖ്ബീര്‍ ആവശ്യപ്പെട്ടു. കഴിഞ്ഞദിവസം ബാദല്‍ താന്‍ തരണില്‍ ഒരു പാര്‍ട്ടി റാലിയില്‍ പങ്കെടുത്തിരുന്നു. 

സുഖ്ബീര്‍ സിങ് ബാദലിന് കോവിഡ് സ്ഥിരീകരിച്ചതിനെ തുടര്‍ന്ന് അകാലിദള്‍ പ്രഖ്യാപിച്ചിരുന്ന പഞ്ചാബ് മങ്ഡാ ജവാബ് റാലികള്‍ മാറ്റിവെച്ചതായി പാര്‍ട്ടി അറിയിച്ചു. കോണ്‍ഗ്രസ് സര്‍ക്കാരിനെതിരെ പ്രക്ഷോഭത്തിന്റെ ഭാഗമായാണ് റാലികള്‍ സംഘടിപ്പിച്ചിരുന്നത്.