ന്യൂഡല്‍ഹി: ദീപാവലി ആഘോഷങ്ങളുടെ ഭാഗമായി നവംബര്‍ 7, 8 തീയതികളില്‍ ഡല്‍ഹിയില്‍ ഹരിത പടക്കങ്ങള്‍ പൊട്ടിക്കാന്‍ സുപ്രീംകോടതി അനുമതി നല്‍കി. ഡല്‍ഹിയിലെ വായുമലിനീകരണ പ്രശ്നത്തില്‍ സമഗ്രമായ നിരോധനം മാത്രമാണോ പരിഹാരം എന്നതില്‍ വ്യക്തമായ വിവരങ്ങളുടെ കുറവുണ്ടെന്ന് ചൂണ്ടിക്കാട്ടിയാണ് കോടതിയുടെ നടപടി. നവംബര്‍ 9 മുതല്‍ പടക്ക നിരോധനം പുനഃസ്ഥാപിക്കുമെന്നും കോടതി വ്യക്തമാക്കി. രാവിലെ 6 മുതല്‍ 7 മണി വരെയും രാത്രി 8 മുതല്‍ 10 മണി വരെയുമുള്ള സമയങ്ങളില്‍ മാത്രമേ പടക്കം പൊട്ടിക്കാന്‍ അനുവാദമുള്ളൂ.
ആശുപത്രികള്‍, നഴ്‌സിങ് ഹോമുകള്‍, പ്രാഥമിക-ജില്ലാ ആരോഗ്യ കേന്ദ്രങ്ങള്‍, വയോജന മന്ദിരങ്ങള്‍, അറിയിപ്പ് ലഭിച്ച മറ്റ് മേഖലകള്‍ എന്നിവയുടെ 300 മീറ്റര്‍ ചുറ്റളവില്‍ പടക്കം പൊട്ടിക്കാന്‍ പാടില്ല. ഈ പ്രദേശങ്ങള്‍ 'നോ-ക്രാക്കര്‍ സോണുകള്‍' ആയി പ്രഖ്യാപിക്കുകയും അടയാളപ്പെടുത്തുകയും ചെയ്യും. വിദ്യാഭ്യാസ സ്ഥാപനങ്ങള്‍ക്കും നിയന്ത്രണം ബാധകമാണ്.
പടക്കം പൊട്ടിക്കുന്നതിന് പൂര്‍ണ നിരോധനം ഏര്‍പ്പെടുത്തുന്നത് ഉചിതമായ പരിഹാരമായി തോന്നാമെങ്കിലും, അത് ഏറ്റവും മികച്ച പരിഹാരമാണോ എന്ന് തീരുമാനിക്കാന്‍ തക്ക വിവരങ്ങള്‍ കോടതിയുടെ പക്കലില്ലെന്ന് ബെഞ്ച് നിരീക്ഷിച്ചു. 2024ല്‍ ഡല്‍ഹിയില്‍ ഏര്‍പ്പെടുത്തിയ പൂര്‍ണ നിരോധനം ഉദ്ദേശിച്ച ലക്ഷ്യം കൈവരിച്ചോ എന്നതിനെക്കുറിച്ച് കൃത്യമായ വിവരങ്ങള്‍ ലഭിച്ചിട്ടില്ലെന്നും, നിരോധനം ഉണ്ടായിരുന്നിട്ടും എയര്‍ ക്വാളിറ്റി ഇന്‍ഡക്‌സില്‍ കാര്യമായ പുരോഗതി ഉണ്ടായിട്ടില്ലെന്നും കോടതി ചൂണ്ടിക്കാട്ടി. ജനങ്ങളുടെ ഇടയില്‍ ദീപാവലിക്കുള്ള മതപരവും സാമൂഹികവും മാനസികവുമായ പ്രാധാന്യം ചൂണ്ടിക്കാണിച്ച കോടതി, പരിസ്ഥിതി നാശവും ആരോഗ്യപ്രശ്‌നങ്ങളും സൃഷ്ടിച്ച് ആഘോഷങ്ങള്‍ നടത്തുന്നതിനോട് യോജിക്കാനാകില്ലെന്നും ഓര്‍മിപ്പിച്ചു.
എന്താണ് ഹരിത പടക്കങ്ങള്‍?
നാഷണല്‍ എന്‍വയോണ്‍മെന്റല്‍ എന്‍ജിനീയറിങ് റിസര്‍ച്ച് ഇന്‍സ്റ്റിറ്റ്യൂട്ട് വികസിപ്പിച്ചെടുത്ത ഹരിത പടക്കങ്ങള്‍ സാധാരണ പടക്കങ്ങളേക്കാള്‍ 30 ശതമാനം കുറവ് മലിനീകരണം മാത്രമേ ഉണ്ടാക്കുന്നുള്ളൂ. ബെറിയം, അലുമിനിയം തുടങ്ങിയ രാസവസ്തുക്കളുടെ അളവ് കുറഞ്ഞ ഇവയില്‍ പൊടിയും പുകയും ശമിപ്പിക്കുന്ന ഘടകങ്ങള്‍ അടങ്ങിയിരിക്കുന്നു. ഇവ കുറഞ്ഞ ശബ്ദവും കുറഞ്ഞ സമയത്തേക്ക് മാത്രം കത്തുന്നതുമാണ്.
കോടതിയുടെ മറ്റ് നിര്‍ദേശങ്ങള്‍
കലക്ടര്‍മാരും പൊലീസ് കമ്മീഷണര്‍മാരും പൊലീസ് സൂപ്രണ്ടുമാരുമായി ആലോചിച്ച് ഹരിത പടക്ക വില്‍പ്പനയ്ക്കായി പ്രത്യേക സ്ഥലങ്ങള്‍ കണ്ടെത്തണം.
വ്യാജ പടക്കങ്ങള്‍ ഒഴിവാക്കാനും CSIR-NEERI അംഗീകൃത ഹരിത പടക്കങ്ങള്‍ തിരിച്ചറിയാനും ഉപഭോക്താക്കളെ സഹായിക്കുന്ന ബോധവല്‍ക്കരണ ബാനറുകള്‍ വില്‍പ്പന കേന്ദ്രങ്ങളില്‍ സ്ഥാപിക്കണം.
അനധികൃത പടക്കങ്ങള്‍ കടത്തുന്നത് തടയാന്‍ ഡല്‍ഹിയിലേക്ക് പ്രവേശിക്കുന്ന വാഹനങ്ങള്‍ പരിശോധിക്കും.
കായിക താരങ്ങള്‍, പ്രമുഖ വ്യക്തികള്‍, അഭിഭാഷകര്‍ തുടങ്ങിയവര്‍ ബോധവല്‍ക്കരണ പ്രചാരണങ്ങളില്‍ പങ്കാളികളാകണമെന്ന് കോടതി നിര്‍ദ്ദേശിച്ചു. സ്‌കൂളുകള്‍ വഴി കുട്ടികളില്‍ അവബോധം വളര്‍ത്താനും ആവശ്യപ്പെട്ടു.
പടക്ക നിര്‍മാതാക്കളും വ്യാപാരികളും നിശ്ചിത തുക സെക്യൂരിറ്റിയായി കെട്ടിവെക്കണം. കോടതി ഉത്തരവ് ലംഘിച്ചാല്‍ ഈ തുക കണ്ടുകെട്ടും.
CSIR-NEERI, PESO അംഗീകാരമുള്ള നിര്‍മാതാക്കള്‍ക്ക് മാത്രമേ നവംബര്‍ 2 മുതല്‍ നവംബര്‍ 6 വരെ ഹരിത പടക്കങ്ങള്‍ നിര്‍മിക്കാനും വില്‍ക്കാനും അനുമതിയുള്ളൂ.
വ്യാജ പടക്കങ്ങള്‍ കലരുന്നത് തടയാന്‍ ഹരിത പടക്കങ്ങള്‍ സീല്‍ ചെയ്ത ബോക്‌സുകളില്‍ മാത്രമേ വില്‍ക്കാവൂ.
ചരടുകളില്‍ കോര്‍ത്ത പടക്കങ്ങളുടെയും (ladis) മാലപ്പടക്കങ്ങളുടെയും നിര്‍മാണവും വില്‍പ്പനയും പൂര്‍ണമായി നിരോധിച്ചു.
ബെറിയം അടങ്ങിയതും CSIR-NEERI അംഗീകരിക്കാത്തതുമായ പടക്കങ്ങള്‍ക്ക് കര്‍ശന നിരോധനമുണ്ട്.
ഓരോ ബോക്‌സിലും പ്രൊഡക്ട് നിര്‍ദ്ദിഷ്ട QR കോഡ് ഉണ്ടായിരിക്കണം. ഇത് സ്‌കാന്‍ ചെയ്യുമ്പോള്‍ നിര്‍മ്മാതാവിന്റെ വിവരങ്ങള്‍, NEERI രജിസ്‌ട്രേഷന്‍, PESO/DM ലൈസന്‍സ്, ടെസ്റ്റ് സര്‍ട്ടിഫിക്കറ്റ് എന്നിവ ലഭ്യമാകണം.
റദ്ദാക്കിയ വ്യാപാരികളുടെ ലൈസന്‍സുകള്‍ ഹരിത പടക്കങ്ങളുടെ വില്‍പ്പനയ്ക്കായി നവംബര്‍ 4 മുതല്‍ 6 വരെ താല്‍ക്കാലികമായി പുനഃസ്ഥാപിച്ചു നല്‍കും.
നിര്‍ദ്ദേശങ്ങള്‍ ലംഘിക്കുന്ന വ്യാപാരികളുടെ ലൈസന്‍സ് റദ്ദാക്കുകയും വില്‍പ്പന വിലക്കുകയും ചെയ്യും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates